السلام عليكم بنات

قبل ما اكتب هذا الموضوع بنص ساعة صار وياية هذا الموقف

للاسف ام زوجي همها الوحيد شلون تنكد علية

هي مثل ماتتدعي انه مريضة لان من تروح للدكتور يكللها كلشي مابيج.....المهم هي على اساس ماتكدر تصعد فوك واني غرفتي فوك

اليوم المطر جان كلش قوي فشفت مي نازل من باب السطح العالي فاني وعمه زوجي صعدنا ننظف فهي لحكتنا عبالها اكو شي فاني كلتلها نزلي ماكو شي بس ننشف المي وننزل المهم كملت ونزلت هي دا تصلي.......

جان تجي علية انتي ليش فارشة هاي الزوالي فوك اني ما اقبل وكامت تعيط علية والله خلتني ابجي وكلتلها والله زوجي كال فرشيها اني هاي عزيزة علية تفرشوها الكم وظلت تجي اني عفتها وصعدت طبعا راسا شلت الزوالي ولفيتها وظميتها ودخلت غرفتي ابجي والله مدا اعرف شاسوي وياها المشكلة اني بس اسكت ما اجاوبها ابدا والله علية شاهد

كلشي ما احجي وياها وفوكاها هي التزعل

والله طفرت روحي والله لو يموتني وارتاح لان

مللللللللللللللللللللللللللللللللللللللللللللللللللللللللليت وتعبت وياها غيرتها مو طبيعية بس تشوف شي مرتب وحلو واني مسويته تخلق مشكلة حتى تضوجني

واني الفوك جنت مسويتة فد شي مرتب وحلو بس شافت هيج انقهرت زين مو اللي لخاطر ابنج ابنج يحب هذا ليش هيج

بنات طفرت روحي وملللللللللللللليت مدا اعرف شاسوي

وجماله زوجي يكول اتحملي ماعدها احد وهي مبزعة وابنها وابتها ويومية مشاكل وبس اني الواكعة بيها

يعني اذا عاطو عليها ولدها اتعاركت وياية

اذا صارت مشكلة تفتر عليه والله اني مو ناقصة

والله دا اكتب ودموعي تجري والله الدنيا طفرت من عيني كلها......

حبي اول شي لاتضوجين من الموقف كلة ولا من حجيي

1- اي واحد بهيج عمر (عمر خالتج ) راح شوية يصير حساس واحنة بعدنة مامخلفين ونبجي علطفل زين هية خلفت وربت ومهما يكون تحس اجت بنية علجاهز واخذت تعب سنينهة

2- مااعرف والدتج عدهة جنة لو لا بس اكيد اذا انطت لجنتهة حاجة وهية تشوفهة عزيزة عليهة وحجت وية زوجة ابنهة باي اسلوب اكيد انتي ماراح تشوفين ضير انو تحجي وياهة لان هية من وجهة نظرهة انو هية تريد مصلحتهة ويجوز حابة تعامل الحاجة اللي هية مطيتهياة باهتمام واحنة كشباب مانهتم لان عدنة وجهة نظر بالتعامل وية الاشياء انو كلشي ميسوة ومنو ماخذهة وياه بس ترة الانسان كلما يكبر يزداد تعلقة بالحياة وبكلشي بيهة

3- انشالة بصير عندج كومة ولد وادري بيج انتي متحملة بس انتي من تتحملين الله راح يرزقج مستقبلا بجناية حلوة وحبابة مثلج مكافأة الج على اللي تحملتي من ام زوجج واكيد هية هم بيهة هواي اشياء ايجابية والمرة الجبيرة بالبيت بركة وعيونج راح تشوفيهة من يصير عندج اطفال شلون راح تحبهم وتحن عليهم وتصير روحهة بيج وبيهم واعتبريهة امج وصارت عصبية عليج بس احنة نتحسس من م الزوج اكثر من الام مع العلم انو امهاتنة دائما يحجون ويزمخون ومرات اذا ماعجبهم الحال يضوجونة بالحجي

4- مااعرف ابو زوجج موجود لو لا لان اذا ماموجود راح تحس بفراغ نفسي وتصير روحة باولادهة واحنة شوفي بس نتمرض او يخلة وجهنة شكد نريد نحس باهتمام اللي حوالينة يسنة حتة لو نضوجهم حتة يهتمون بينة واحنة بعدنة بحيلنة وقوتنة مو يالله من يروح العمر والحيل والقوة الواحد يضل بتمارض ويريد يحس باهتمام

5- اسفة لان ضوجتج او ماجاي اكلج حجي يريحج بس فكري بكلامي راح تلكي منطقي والله يهديهة عليج ويهدي سرج عيوني انتي

حبي لتضوجين ولا تبجين اهم شي زوجج زين وياج لان خالتج مدايمتلج بس زوججهو دايملج ان شاء الله

حبي لو تطلعين بيت وحد احسنلج والله تحس بقيمتج وتصيرين عزيزة عدهم

حبي نونة هو كلامج صحيح واني جربت عزة الضنا واشكرج على كلامج الحلو بس اكو شغلات انتو ما تعرفوها

واني امي متوفية واكللكم على شغلة وحدة بس واترك الحكم الكم اذا انروح اني وزوجي ننام فوك الظهر تكوم تحجي واحنا موبوحدنا ويانه عمات زوجي مامتزوجات

يعني اني اربع شنين من متزوجة ومحرومة انام الظهر وية زوجي كلها انام بالهول او بوحددي بالغرفة

لان نخاف على مشاعرها وانتو احكمووووو بعد

بس والله كل هذا واكول خطية واقدر مشاعرها

حبي ايلاف اني ما اوصلها لهذي الدرجة حبي مهما تكون هي خالتي وام زوجي ومرة جبيرة بس مرات تسوي روها اصغر مني

حبي ميوسة لتضوجين بس شوفي شلون الله رح يوكف وياج ويوفقج لانه انتي متجاوبيهة ولا تحطين عقلج وياها يعني تعرف كلش زين انتي شكد عقلج جبير واخلاقج عالية واكيد زوجج حيقدر هالشي كلش ويصير وياج متعاطف اكثر من الكل والله يهديهة عليكم

تسلمون بنات الله يبرد كلوبكم

ام حواء حبي اول شي نورتينا هسة يلة ارتاحيت من شفتج موجودة

ثاني شي والله اني هذا اللي سويته واجا وشاف الزوالي متغيرة لان عمته مثل ماكتلج تحبني كلش فكالت خوما تظلون بالبرد خطيه صعدت وفرشت الزوالي مالتهم وكالت شنو اللي تريدية تدخلين للمخزن وطلعين

بس المشكلة امنيتي زوجي يكولي حجاية تبرد كلبي يعني من كتلة اللي صار ضحك وكال وشسويلها

بس هسة لاااا لاوالله منكعدت الصبح هي دا تروح للدوام سلمت عليها وضحكت واصلا هي اللي حست بغلطها وماتعرف شلون تلغمط الموضوع واني هم ماخذتها على كد عقلها

بس هسة اخذت اللابتوب وصعدت فوك حتى اسولف وياكم براحتي

خخخخخخخخ خمطتها

طبع

تسلمين لولة والله اني ما اجرحها بحجاية بس اني المشكله كلش حساسة واني شايلة من عدها على موضوع الطفل يعني دائما تتحسني بهمي اذا شفنا طفل يعني ابسط شي فبل اسبوع وحدة من اقاربنا جابت جان تكول اييييي بس اني ماحضيت بحفيد يعني اني بيدي لو تكول نتي اللي كتلتيها لان ظليتي بس تقهرين بروحج من فاتحة امج

زين هاي شتخليلها حتى تطيب يعني تخاف على مشاعر ابنها من هالموضوع واني طز

والله لولة اسلوبج وياهة احسن شي وقررت من ارجع استخدم هذا الاسلوب وياهم بس مشكلتي مااتحمل لازم اظل ادرب نفسي حتة اتعلم والله ماادري شلون اتعامل وياهم خاصة امة على سالفة الحمل يعني شنو مشايفة جهال هية واذا تاخرنة شوية والله من اول اسبوع تزوجنة كامت تتسال وحتة من جينة هنا مخلصت تخابرة تكلة ها اجتهة الدورة وطبعا الله اعلم زوجي شيحجي وياهة من يطلع بس كدامي اسمع الحجي بالتلفون لان كاعد يمي مرات تظل تسال بي هوة يكلهة الله كريم ممستعجلين والله اني اكوم افور يعني اذا نرجع شكولهة برايكم يعني والله احسهة سخافة ليش يدخلون بحياتنة والله يابنات اني ضوجتي واعصابي التعبانة كلهة من ورة هاي سالفة انه حنرجع وشلون رح اتعامل وياهم ماعدا انه زوجي يريد يكعد وياهم واني معاندة مااريد مع العلم عدهم بيت فارغ وميقبل واني هم معاندة كلت هذا الشي الوحيد اللي مااتنازل عنة لان اعرف روحي مااتحمل واموت من حرك الدم

طبعا اعتذر حبايبي ميوسة وشوشو بس ورة متقرون ردي كولولي حتى امسحة لان اخاف منها احسها تعرف كلشي داسوي او احجية وراها ههههههههه

هههههههههه زين لولة شلون تعرف؟؟؟؟؟؟

ميوسة اكدر احذف مشاركتي لو ميصير بعد شو مدتنحذف

ههههههههههههه لولة ضحكتيني والله ياربي تجيبين وتكسرين عينهم والله اني من يمي بس اريدج تجيبين بالسلامة عاد والله ورح اتبع هذا اسلوبج احسن شي يلة يفيد بيهم

حبيي لولة يصير تحذفيهة اكو فوك اللي كتبتي اكس حمرة حذف

تسلمين حبي لولة

لولة حبي الله يساعدج عليها

بس ام حواء تكدر تخذف المشاركة

خوش حياتي ايلاف زين كتيلي تسلمين  ياوردة