مرحبا عزيزاتي شلونكم ام حواء وميوسه ونور الهدى ولوله انشالله الجميع بخير حبيت اطمئن على الكل ..
وبالنسبه الي باجر يصير 9 اشهر على ولادتي ولحد الان ماكو حمل وتحاليلي وتحاليل زوجي طلعت نظيفه وماعدنه اي مشاكل بس مدا اعرف شنو سبب تاخر الحمل والي تعرف دكتوره زينه بغداد وبمكان بالكرخ ياريت تنطيني عنوانها .. وبس حبيت اسأل اني مدااكدر ادخل للموقع الا كزائره مع العلم اني مسجله ودااكتب الاسم وكلمه السر صحيح بس هم مدا يدخل مااعرف ليش ..

هلو حبيبتي دموع الورد نورتينا عمري شلونج شخبارج ان شاء الله زينة
حبيبتي مايخالف حتى لو عبرتي 9 اشهر والحمدلله تحاليلكم سليمة فلا يظل بالج هو يجوز ديتأخر الحمل لان دتفكرين بيه
وهم حاولي تراجعين دكتورة ريا هنا البنات يراجعوها بس اني معرف عنوانها بالظبط ان شاء الله البنات يفيدوج ماشاء الله تبين حبابة وخوش دكتورة من حجي البنات عليها حسيتها هيج
روحيلها وباذن الله ترتاحين يمها وتبشرينا
والله يعوضج بكل خير حبي
سلامي الج

حبيبتي عادي اني 6 شهور يلة صار حمل وميوسة اتصور هم 9 شهور عليج بالاستغفار ونور الهدى الوردة مقصرت ماكو احسن من دكتورة ريا الوردة عيادتها ب14 رمضان بنفس عمارة مختبر 14 رمضان يم زنود الست شاكر الحمداني اني شفت برهومي على ايدها ورة اسقاطي وميوسة هم دتراجع عدها وربي يحفظها ويكومها والنونو بالف سلامة وشوشو هم اتصور جانت دتراجعها شوفيها وان شاء الله تحبلين

اسمها ريا خالد العسلي

هلو بنات شلونكم انشالله الكل بخير ... طبعا شكرا جزيلا الكم كلامكم ينطي امل كلش كبير واني من اكتبلكم اكون كلش مضايق ومتكأبه بس ردودكم مشجعه وتخلي الواحد يتفأل اني هالشهر راجعت غير دكتوره ردت اشوف كلامها نفس كلام دكتورتي من عرفت قصتي ماقصرت ويايه كلش اهتمت بيه وره ما شافت التحاليل واخذت سونار وفحصتي كالت نفس كلام دكتورتي ان مابيه اي شي وكالتلي اذا بقيتي منا لحد مرور سنه على ولادتي على هالوضع ان مابيه شي كالت معناها اكو احتمال كبير ان صاير عندي انسداد من وره العمليه فسألتها شنو السبب كالت اكو قسم وره العمليه يصير عدهم التصاقات تسبب انسداد وكالت كل الي يسووها وهم مابيهم شي يحبلون نفس الشهر فكالت انتظري هاي ل3 اشهر اذا متغير شي لازم اتسويها لان ماكو غير سبب وطبعا هذا اقتراحها نفس اقتراح دكتورتي .. بس اني اخاف اسوي للناظور لان يكولون كلش يأذي وهن طمنني ان هسه ديسوها تحت التخدير والله كريم انشالله ياربي مااحتاجله مثل ماحبلت بذاك بدون اي شي هسه هم احبل هيج .. لتنسوني بالدعاء ...