اول شي الف الحمد لله على نعمته التي انعمها عليه ياللهي لك الحمد كما ينبغي لجلال وجهك الكريم وعظيم سلطانك......طبعا اني دخلت بشهري التاسع يوم 15\7 وكان موعدي وية الدكتورة ربي يجازيها كل خير العصر رحت اني وزوجي جان تقيس ضغطي طلع مرتفع كالت عمليتج الباجر بعدين كالت لا خليها على الخميس علمود اني خفر بالمستشفى حتى اكون وياج وكالت اخذي فاليوم ونامي خلال هاي الفترة طبعا رجعت للبيت اني وزوجي بس صافنين خوف على قلق ماعرف مشاعر هووووسة كل تفكيرنا انه لاينعاد علينا ذاك اليوم المشئوم  ربي لايعيدة على الكافر المهم اجة يوم الخميس واني ابد مانمت بليلتها بس اصلي وادعي ودموعي عشرة عشرة جنت حيييييييل خايفة من العملية وصارت الساعة خمسة ونص الفجر كمت سبحت ودا ابدل زوجي كعد وطبعا جان رمضان فكام راسا غسل وبدل وانتظرنا اجتي اختي وتوكلنا على الله وطلعنا وصلنا للمستشفى وبدة زوجي يمشي باجرائات الدخول ودخلنا الغرفة جانت الساعة تقريبا بالتسعة اني توضيت وكعدت اقرة قران هستوني كملت جان تجي الماسير كالت يلة ميس اتحضري وجيبي وياج ملابس البيبي بين ماغسلت واتحضرت طلعت من الغرفة الساعة بالعشرة ضبط دخلت لصالة العمليات وكعدت بالانتظار مااحجيلكم القلق والخوف وبس اردد ربي لاتعيد علية ذاك اليوم ربي فرحني طبعا حتى اهلي وزوجي مكدرت اودعهم لان جنت بالقوة لازمة دموعي بس اني وامشي كلت مع السلامة وطبعا اني كاعدة بالانتظار جان تجي دكتورة ريا كالت هي ميس شلونج كتلها الحمد لله جان تكوم تحجي على الماسيرات شلون هاي تخلوها بالحر غير تنطوني خبر من تجيبوها هاي بس حالتها النفسية كافي هالمرة تخلوها بالانتظار جان تكودني ودخلتي يم العمليات كالت بس اكمل هاي العملية ادخلج بس تعالي كعدي على البرودة لايرتفع ضغطج دخلت وكعدتني على كرسي بس شنو كدامي صالات العمليات وحدة جانو دايشتغلون بيها اني صافنه وجان يجي واحد من وراية يلزم كتفي ويكول هاي شعدها هنا اني ردت اموت فزيت فزة وجمالة هو ضخم واسود واصلع يبووووووو متت خوف جان ريا راسا تصيحله هاي مريضتي عوفها كال لا ديري وجهج على الحايط المهم اني كاعدة جان تجي الماسير وتكول يلة ميس تعالي كمت بالكوة تمشي رجلي جنت حييييييل خايفة عكس ذيج العملية ابد ماجنت خايفة سبحان الله دخلت للصالة وجان واكف المخدر والمساعدات ونمت على السدية مال العملية باوعت على الساعة جانت 11 الا ربع اجة المخدر وسالني شعندج اطفال كتلة ماعندي كال لعد شلون ثاني قيصرية مكتوب بالطبلة كتلة اني قصتي كيت وكيت كال اوك...خلة الكانونة واجة كال رح تحسين بالبداية بدوخة سمي باسم الله وطبعا اني جنت ادعي للكل بديت من ام فطوم وام برهوم وشوشو وايلاف ودودو ودموع وجنة ونور الهدى ونور فاطمة واهلي ... جان يجي المخدر وخلة الكمام على وجهي صدك بديت احس بدوخة وراها فصلت بعد مابديت اصحة حسيت على نفسي اكول مخنوكة وبالكوة اسحب نفسي وجان المخدر يمي ودكاترة 2 هم بديت اصحصح جان اشوف اجهزة وعلى خشمي جهاز التنفس جان المخدر كال ميس الحمد لله على السلامة خوفتينا عليج كتله مخنوكة كال بس هسة نعمة احسن جان طبيب ثاني كال ليش ماكلتي عندج ربو مو هذا البنج مايوالمج اني ساكتة بيني وين نفسي اكول يعني معقولة تجي بنتي هالمرة اني اموت وما اشوفها جان المخدر كال هسة انتي يمنا نراقبج وشوية بعد ونطلعج لغرفتج المهم طلعت للغرفة الساعة بال2 ونص واني دخلت العملية بال11 الا ربع  لان خلوني بالعناية المركزة تقريبا ساعتين وطلعت الغرفتي وهنا احلى شي طلعت لكيت زوجي واختي وخالتي واخت زوجي واصدقاء زوجي كلش مقربين من عدنا وولد عم زوجي كلهم فوك راسي ويهنوني مبروك ام لينا  وزوجي لازم راسي ويبجي ودخلت الغرفة جان خالتي تكللهم جيبولها لينا لان مراح تصدك بينا اني اكللهم صدك جبت يعني بنتي عايشة زوجي يكول ميس لينا كلش حلوة وكبرت باذنها ويبجي واني هم كمت ابجي وكامو يهلهلون بحيث المستشفى انكلبت الماسيرات اجوي اختي تكللهم مامصدكين عوفونا ههههههههههه وجابولي لينا اني بس شفتها طكيت بجي واكول الحمد لله....اني اسفة لولي كعدت بعدين اكمل القصة

ياعمري كاعده اقرا وابجي والله الحمدلله على سلامتج والله كومج بلسلامه الله يحفظها الج وان شاء الله يبعد عنج كل مكروه وتبقين فرحانه بجاه كلمن عنده جاه والله يرزق كل محرومه

ميوسة مااكدر اكتبلج اي تعليق غير الف الحمد لله الشكر لان مااكدر اكتب اي شي لان نطيت من البجي ولازم اكوم اجيب باكيت الكلنكس يمي لان حالتي صارت مزرية من البجي

عدنا هههههههههههه.. ياربي يفرحج بيهة انشاله ويعوض صبرج خير بحق محمد وال محمد ويبعد عنج كل حزن وسوء طبعا اني استشعرت كل كلمة كلتيهة صح اني مامارة بنفس الضرف بس كل واحد بينة مصدوم بحاجة من يمر بضرف مشابه يوكف كلبة من الخوف والله يساعدج ويتمهة بتمامة انشاله ويجنبج كل مكروة يارب

ولججججججججججججججججج اشو بس اني ماداعيتلي هسة انتبهت وزعلت 

صلوات على النبي والله بجيتيني ياعيني الف مبروك فرحتج بلولي ربي يحفظها الكم وتجيبيلهة دستة اخوان وخوات ربي عوض صبرج خير ياعمري