السلام عليكم

تجربتي مع التلقيح الصناعي

بتاريخ 23 _4 سويت التلقيح الصناعي والتجات الى هذه الطريقة بعد ما مريت بمرحلة من العلاج والمنشطات لان كنت اعاني من تكيس المبايض وبدون جدوى

الى ان صار عندي كيس وظيفي وظليت اخذ علاج لمدة شهر ولا فاد

بعدها الدكتور كال خلي نحاول نطلع بويضة بحجم مناسب حتى نلقحها لان بس الحمل اللي راح يعالج حالتج

وبالتاريخ اللي ذكرته لكم بع اخذ منشطات وابرة تفجيرية سويت العملية انتظرت طبعا لا حركة ولا اي جهد بس نايمه على ظهري

وبعد تاخر الدورة 12 يوم الدكتور يكول هذا الكيس كبر وهو السبب بعد نزول الدورة

للعلم في اول يوم تاخر الدورة قال اكو بداية حمل لان الرحم مستعد وبطانة الرحم متغيرة يعني بعد اكثر من عشرة ايام يظهر ورحت

قال لااااااااااا مع الاسف صاير كيس ........اني لا تعلييييق

وقالي لازم تكملين العلاج وتتابعين وتراجعيني حسب المواعيد لان اذا مراح يعني انسي تحبلين

اني رجعت للبيت وقلت مع نفسي

خلص الدوة بسلة المهملات والكارت مزقته ولا اروح ولا اجي وانتهى الموضوع

وعشت حياتي كاني جديد متزوجة نزلت الدورة جدا طبيية بع دما اتاخرت عن موعدها ب4 ايام والشهر الثاني صادف رمضان والدورة المفروض تجي اول يوم رمضان قبل ثلاثة ايام

حضرت مجلس ((لام البنين)) ودعيت وبعدها رحت لبيت اهلي وظليت اسبوع والدورة ما كو بس نزلت افرازات بنيه شوووووووووويه

ورجعت يم زوجي وهم ماكو وظليييييييت 20 يوم واني صايمة

طبعا هسة ام حواء تكول هنيال اعصابج

بيومها زوجي جابلي تيست الحمل وسويت التحليل طلع خطييين

ماصدكت ثاني يوم الصبح رحت سويت تحليل الدم وكالللللللوللللي

مبروك حامل

وهذه قصة حملي الاول واللي ما كمل على خير الحمد لله على كل حال

يامن امره بين الكاف والنون واذا اراد شيء قال له كن فيكون ارزقني اني ولكل محرومة فرحة تقر بها العيون

يادافع النقم يانور المستوحشين بالظلم ياعالم لا يعلم افعل بي ماانت اهله وارزقني فرحة اخر لك بها ساجدة باكيه حامدة شاكرة

يارحيم يارحيم يارحيم

الله يرزقج حبيبتي بدون اي منشط ولا ابر

تسلمين ايلاف وانتي وياية عاجلا غير اجل

يارب

حبيبتي ميوسة الف الحمد لله على سلامتج اولا واخيرا بس اني من تجربة شخصية هم صار عندي كيس وضيفي اللي هوة مو شي يخوف هوة بويضة مانازلة بوقت التبويض تكبر وتكبر الى ان تشغل حجم بالمبيض كان يكن 4 سم او اقل لان اذا اكبر من 6 سم شوية يكون خطر والحالة الثانية اللي ممكن يكون بيهة الكيس الوضيفي هوة ان يصير اكو تبويض بس ال( شيلف) اللي هوة غلاف او حويصلة البويضة ماتزل وتذبل بعد التبويض فتكبر وتنملي سوائل وبالحالتين مايصير ينطيج الطبيب اي منشطات ولا يسوي تلقيج اصطناعي مادام انتي عندج هذا الكيس لان راح يكبر اكثر ويصير خطر وعلاجة الوحيد انو ينزل بالدورة واذا منزل بصورة طبيعية لازم ينطي حبوب منع الحمل او حبوب بريموليوت او اي حبوب بيهة بروجسترون حتة يصغر وينزل .. الله ينطيج الصحة والعافية دائما بس لاسامح الله اذا صار عندج مرة ثانية واكرر هوة شي ميخوف ويصير غالبا وية المنشطات فديري بالج تكملين بالمنشطات الا ينزل هذا الكيس

حبيبتي نونة اني بوكتها من كال صار كيس تركت العلاج اللي هو اطانيا وكلت اتركها على الله وسبحان الله نزلت الدورة طبيعية والشهر الي بعدها حملت بس الله ما اراد يكمل بخير

والله يفرح كلبج بالقريب العاجل