قصه ولادتي بنور عيوني # تيمـــــا # فطومه

السلام عليكم
اول شي امانه اللي تبدي القصه تكول بداخلها اللهم صل على محمد وال محمد ما شاء الله تبارك الله

اول شي كلكم تعرفون بدايه حملي تاخرت الدوره الدوره عليا وضليت احلل وكل ما احلل يطلع سالب لحد ما تاخرت الدوره 10 ايام تقريبا رحت للسوك اشتريت تحليلين
واول ما اجيت للبيت سويت اول تحليل طلع خط خفيف كولش يا دوب ينشاف كولش فرحت بس ضليت اكول خاف غلط التحليل
وعلى اساس انتضر يوم الثاني بس مكدرت انتضر وهم سويته طلع خط خفيف وكولش فرحت لان جنت متاكده مدام يطلع خط خفيف يعني اكو هرمون حمل بالدم نسبه ضعيفه
واول ما اجى رجلي من الشغل كلتله اني حلمت اني احامل كال اكيد مشتريه تحليل لان جان ما يقبل اشتري تحليل من كثر التحاليل اللي اشتريتها
كلتله اي صحيح بس ما متاكده
وطلعنا نجيب شويه اغراض للبيت واشترالي التحليل الديجيتال اللي يكتب حامل لو لا وعدد الاسابيع

واول مرجعت للبيت كلي يله سويه واني جنت خايفه افشل
المهم سويته وجان يكتبلي pregnant 1-2 weeks
وصدوك جانت فرحه اليا بعد خسارتي لحملي مرتين

ورجلي هم فرح
وبديت هنا بالمراجعات يم الدكتاره وجانت حالتي تتطلب متابعه دقيقه وقررت الطبيبه اخذ بيبي اسبرين يوميا حبه وفيتامينات اوميغا 3 يوميه حبتين
واستمريت عالمراجعات كل اسبوعين سونار وتحاليل زلال وضغط ووزن وسكر
والحمد لله خلال الحمل ابد مصعد ضغطي بالعكس جان بس بالبدايه شويه يصعد وبعدين كله نازل 10 / 6
وزلال هم مره وحده ارتفع شويه وراح
وسكر الحمد لله ماكو
ووزني بدايه الحمل جان 84 واخر شهر صرت 102
وكالولي 16 كيلو طبيعي مو مبالغ بيها

المهم عدت شهور الحمل والقلق والخوف وانتوا متابعين ويايه الى ان وصلت اسبوع 26 كالت الدكتوره بعد ما اكدر اكمل وياج لان مو من صلاحياتي هسه دور المستشفى

ومن رحت الله ذب عليا دكتور رجال جبير صدوك رحمه من رب العالمين قره كل الهستوري مالتي وعرف حالتي كلي نستمر نكمل كل اسبوعين سونار
وكمت كل اسبوعين اروح يسولي سونار ملون رباعي ويقيس المي ويقيس الطفله وصدوك اطلع من يمه مطمئنه
جنت كل ما اروح اكوله اذا اكو شي خطر خليني هسه اجيب يكولي لا حملج طبيعي

ومن طبيت بالاسبوع 32 كلي بعد كل اسبوع سونار للاطمئنان
وبالمراجعه مال اسبوع 34 كلي بعد اسبوعين تكطعين الاسبرين فاني كلتله اخاف ميوصل اكل للطفله كال مراح ننتظر للاسبوع 40
اسبوع 37 اخليهم يجيبوج

ردت بالبدايه عمليه مقبل كال لا طبيعي تجيبين

ومشت الايام اني مكلت لاي احد احتمال اجيب اسبوع 37 الى ان اتاكد لان طبيبتي جانت معارضه وتكول ما عندج مشكله تنتظرين للاسبوع 40
بس اني كولش تعبت وصرت ثكيله وحتى ما اكدر امشي وبدت ايديا تخدر ورجليا وبس اوكف الثكل يموتني

رحت مراجعه اسبوع 36 جانت يوم 2 .5
الطبيب بدون ميسالني حددلي دول مستشفى يوم 7 خمسه
يعني اصير 36 اسبوع و4 ايام

اني هم اتوكلت على الله وكلي تجين يحطولج طلق صناعي وتجيبين بنفس اليوم
وكلي الولاده الثانيه تطول اقل ساعه ونص من الولاده الاولى اني كولش فرحت لان ولاتي الاولى طولت 9 ساعات

رحت يوم 7 _5 للمستشفى هوه مموجود لان مسافر
اجوي الممرضات والدكتور البديل وهنا المفاجاه
كالولي لا منحط طلق صناعي راسا اول شي نجرب نحط بالون
عباره عن شي مثل القسطره يفوت للرحم وينفخ بمي وملح وقطره تقريبا 4 سنتيم او شويه اكثر ومن يوكع معناها توسع الرحم

حطولي القسطره وكلولي رجعي للبيت من تكوع تجين للمستشفى وعيشي حياتج طبيعي
اني رجعت للبيت ورجلي راح يم اصدقائه
جنت جوعانه طلعت بيتزا من الثلاجان واجيت للصاله كعدت عالقنفه وجان كومه مي ينزل عليا
خابرت رجلي كلتله يمكن مي الراس نزل وخطيه اجه رجلي بسرعه وخابرنا المستشفى كالوا تعالوا فورا

رحت فحصوني كالولي هاي البالون مفجور والمي نزل مو مي الراس وحطولي بالون ثاني
ورجعت للبيت
ساعه عشره بالليل حسيت وجع خفيف فتتحت للحمام راسا وكع البالون خابرنا المستشفى كالوا باجر تجون 10 الصبح

رحنا يوم الثاني فحصوني كالوا توسع بس 1 سنتيم
واني بالاصل عندي بس سنتيم

كالولي راح نبدي ننطيج طلق صناعي تحاميل 8 تحاميل اقصى شي والفرق 4 ساعات بين وحده واللخ

وبدوا يحطولي وبعد صرت تنويم بالمستشفى
اول يوم حطولي 2 وماكو اي طلوكه او توسع

وثاني يوم حطولي 3 وهم ماكو طلوكه او توسع كالوا منا لباجر اذا ماكو نحطلج طلق بالوريد بس هذا سريع وتبدي الطلوكه الحقيقه
وطبعا مصارت طلوكه
مره وحده صار طلوكه نوعا ما قويه وكالولي خابري على زوجج راح ندخلج ولاده خابرت واجه رجلي 3 بالليل وضل طلق بدون توسع الى ان برد الطلق وراح الوجع
واجه يوم 10 خمسه

لحد ساعه 12 الظهر ماكو شي
ودخلوني غرفه الولاده وبدوا يحطولي طلق خفيف بالورد ويزيدون الجرعه وحاطين يم راسي ماسك مال غاز كلوولي كل ما يصير وجع جري نفس منه يخفف الوجع بي مخدر
وصدوك بدا يقوى الوجع شويه شويه والطلق بين وده واللخ صار 4 دقايق وطبعا طول الاربع ايام مشكلين على بطني جهاز النبض والطلق واباوع بالشاشه النبض وشكد فرق بين الطلقات وقوتها

المهم كام الوجع بعد مينحمل من تجي الطلكه تصير الدنيا ظلمه وخطيه رجلي يفرك بايديا ورجليا واني احط الماسك بوجهي واغمض من تروح الوجعه افتح واسولف وهكذا الى ان كمت ما اتحمل ضربوني ابره مورفين وصدوك بدا يخف الوجع وسالوني اذا اريد ابره الظهر كلتلهم ما اريد علمود سامعه بالمضار مالتها بعدين

الى ان صار التوسع 4 سنتيم اجوي فتحولي مي الراس وكومه مي نزل صار فيضان
وحطوا التخطيط على راس الطفله مثل واير رفيع وشكلوه عالراس وشالوا الاجهزه من بطني

الى ان صار التوسع 5 سنتيم كمت بعد ما اتحمل ضليت بس اجر نفس يا دوب وترجع الطلكه كلتلهم فورا تجيبولي ابره الظهر

وعلى ما اجه الطبيب المتخص وخدروا ضهري وضربني ابره الظهر
ورا 10 دقايق صدووك فرق من السما للارض خف الووووووووووجع كولش
وصارت الطلكه تنحمل
واعصابي ارتخت وانفتح الرحم صار 7 وماكو يمكن ربع ساعه صار 10 صاحوا الممرضات
وكللولي من تبدي الطلكه ابدي دفعي
طبعا اني لا بجيت ولا صحيت ولا نفس لان جنت اريد اخزن طاقتي للدفع

واول مره بديت ادفع وهم يساعدوني يدفعون رجللي بالعكس ورجلي لازم ايدي خطيه ويفرك جتفي
وثاني دفعه كلوولي يله دنشوف الراس وعدها شعر هوايه اسود
وثالث طلكه اربع دفعات وجان اسمع صوتها تبجي يا عمررررررررررري وطلعت كلها ورفعوها ليفوك بالمكلوبي وحطوها على صدري وهيه ترجف وتبجي
وخلوها شويه على صدري ورجلي كص الحبل السري
جانت 8 ونص المغرب يوم جمعه
وطلعت المشيمه وكللولي صارت جروح لان مسولي توسيع بس جروح داخله
وسولي 4 خياطات بس محسيت حطوا جل مخدر واني ملتهيه ببتي
ورجلي خابر اهلي ديباعون عرب ايدل ههههه

وخطيه فرحووووا كولش وابويه حتى ما جه بالتلفون كبل راح يصلي ركعتين حمد وشكر طبعا همه جانوا ينتظرون لان يعرفون اني بالمستشفى

ونقلوني لغرقتي ونور عيوني تيما ويايه وسميناها فاطمه لان اهل البيت فدواتهم هلكد نخيتهم ما قصروا

واكيد بفضل رب العالمين بالاول والاخير

وندلعها تيما
وكل طلكه جنت ادعي شكو بكلبي الي ولاهلي والكم ولبنات بغير منتدى ولبنات بالفيس والله شاهد منسيت احد

ويا رب يرزق كل متاخره بالحمل وتجرب هالشعور
ويا رب تسهل ولاده كل حامل

هسه كولش دا اشتاق لايام الحمل بس كولش ما بيه حيل احبل بعد حاليا لازم راحه طويله هههه

وبعد عندي تفاصيل هوايه بس دا اكتب مستعجله لان بالكوه نامت وعندي شغل وممسويه اكل

وان شاء الله ينملي القسم قصص ولاداتنا

اللهم صل على محمد وآل محمد

حياتي الله يساعدج هواية تعذبتتي بس الحمد لله صارت سوالف وبعد لتكوين اشتاقت للحمل تتذكرين شلون جنتي تتعذبين من متتحرك فطووومة هههه. اتشاقى وياج بالمرة الثانية نريد تووووم

تدرين من قريت قصتج اتمنيت أجيب عملية لان أتذكرت الم الطبيعي والله يهون على الكل أن شاء الله وربي يحفظ لج بنوتج من عين كل حاسد وتشوفيها أحلى عروسة ياربي

حياتي الوفه صدكيني شكد وجع قوي اول مينزل الجاهل كله يختفي
وتكولين يا رب يعوده عليا
ويا رب نقرا قصه ولادتج بزهوره

اللهم صل على محمد وال محمد والحمدلله والشكر ولدتي الحلوة تيما وتتربى بعزج وعز ابوها ان شاء الله اني خفت حيل من وجع الولاده يعني ما كدرتي تتحملين الا ابرة الظهر اكول خاف هنانه بلعراق ماكو هاي الابرة المهم كمتي بلسلامه وارتاحيتي وان شاء الله كل البنات تولد ولاده سهله واني هم

لا حبي عهوده ابره الظهر موجوده بكل مكان
وهيه ممرغوبه لان بيها نسبه خطا اسم الله لازم طبيب مختص يضربها لان بالنخاع الشوكي بالعمود الفقري
الله يكومج بالسلامه حبي انتي والبرنس

الله يسلمج حبيبتي انتي وكلش فرحنالج بلحلوة الصغيرة ان شاء الله ايامج الجايه راحه وسعاده

حياتي عهوده وايامج عمري

صلوات على محمد وال محمد حبي تتربى بعزكم ان شاء الله وتجيبولهة اخوان وخوات ياربي والله لايحرم اي وحدة من هاللحظة يااارب

صليتي على نبيج حياتي شوشو ويا رب نفرح بخبر حملج بحق محمد وال محمد

اللهم صلي على محمد وال محمد ربي يحرسكم من كل عين ماصلت على النبي
ماشاء الله تبارك الرحمن....
حياتي الف الحمد لله على سلامتج وعلى سلامة عروستنا تيما ربي يحميها
بس ما كتيلنا زوجج شنو مشاعرة ؟؟؟؟
حبي الووفة لاتخافين ولا شي حبي صح انتي مريتي بيها وشفتي الامها للولادة بس صدكيني هسة ان شاء الله من تجي زهورة بس تشوفيها كلشي رح ينتهي
هي بس يطلع الطفل وراها كل الم يروح
بس العملية انتي تفتحين عينج تشوفين النونو بصفج وفرحانة بس خلي شوية تحركين رجلج شوفي الالم اللي يصير وخصوصا من يجون الممرضات بعد اربع ساعات يكوموج يبووووووووووووو
مال تملخين نفسج بالكووووووة تمشين
لاتكدرين ترضعين عدل لاتكدرين تكومين الا بمساعدة احد لحد ماترفعين الخيط
وتظلين فترة لاثقل لاشي ماتكدرين تشيلين
واني هسة عرفت ليش يفضلون الحمل بعد العملية بسنة لان والله هسة بطني مو كبرت احس الجرح يريد يفتح ومن انام واريد انكلب اووووويلي شلون تجلب اضل افرك بيها لحد ماتفك
واني هسة ادعي كون الله يسهلها من عندة وتصير ولادة طبيعية لان الدكتورة تكول اذا صارت من ربج ولادة طبيعية رحمة بس اذا دخلتي بالتاسع اسبوع وماكو شي عملية واني اكول علواه ولادة طبيعية لان الم ساعة ولاكل ساعة
وربي يتمملنا على خير يارب اني وياج وعهوودة ونونة ومانعرف شنو اخبار هنودة
ويرزق كل محرومة يارب ونفرح بشوشو ونور الهدى ودودو وكل منتظرة يارب بحق هاي الايام المباركة
ويحفظلنا ام القلب الطيب هي وفرحة عينها ام فطومة يارب العباد

اووووووووووو مليووووووووووووووووووون مبروك وعقبالى وعقبال كل حامل يارب مانشوف اللحظة دى والله يبارك لك في بنوتك ويحفظهالك من كل شر ويجعلها ذرية صالحة وبجعلها من حفظة كتاب الله الكريم .

حبي ام فطومه الله يخليلج فطومه اريد اسئلج عن التأثير الجانبي لابرة الظهر اذا دكتور مختص ضربج وراح الالم هم بيها تأثير بعد الولاده لو لا لان دا ابحث بالنت سوو بيها هواي تاثيرات اني اريد انتي شنو حسيتي اثرت عليج وتسلمين عمري

حبي عهد اني رح احجيلج عن تجربة ويه اختي
لان اخذت ابرة الظهر وبنت خالتي صارلها شهرين من جابت هم اخذتها ابد مايحسون باي اثار جانية الها
بس اني اكلج ابوقتها يصير وجع راس قوي يظل تقريبا يومين وراها يروح
بس البنج العام اني ماخذته اظل دايخة تقريبا 3 ايام والعفو مثل البلغم يصير بالصدر يظل اسبوع ومنا العملية لاتكدرين تكحين تتاذين وبنفس الوقت مختنكة تريدين تطلعي ماتكدرين
اني جنت شلون السيارة اللي تشحط حححححححححححححححححح
يلة شوية ارتاح هههههه
حبي ان شاء الله تجيبين طبيعي وماتحتاجين اي شي

ميوسه وعهوده
اذا الطبيب مو شاطر وضربها بشكل غلط تسوي اسم الله شلل لان بالنخاع الشوكي
والشي الثاني ممكن تسوي تجمع سوائل بالراس وهذا سبب الوجع

واني بالنسبه الي بقت رجلي خدرانه لحد ثاني يوم ما احس بيها ولااكدر اوكف عليها ويودوني ويجيبوني بالكرسي المتحرك تعرفونه ويدفعوني
حتى الابر مال ورا الولاده كلها ضربوني بفخذي لان اصلا ما عندي ي احساس برجلي
ومن يطلعون الابره ورا الولاده لان هيه طول الولاده موجوده بالظهر مثل القسطره اعتقد
من يطلعوها يومين تلاثه وجع مو طبيعي بمكانها ومتكدرين تتحركين بسهوله

بس الحمد لله عدت على خير
حتى من راد يضربني الطبيب الابره
كلي احتمال خطا اكو كل 100 امراه وحده ممكن تخطا وياها
واهم شي وحده متتحرك من تضرب الابره بحيث ممرضتين يلزموها والطبيب

ما افتهمت ام فطومه ههههههههههه يعني صار وجع مو طبيعي يبقى يومين بمكان الابرة بلظهر لو وجع عادي واني مشايفه القسطرة شلون شكلها يعني تنصحيني بيها لو لا اني هذا الموضوع كلش شاغل تفكيري

ها وصدك تزيد شعر الجسم لو لا لان اني بدون شي مشعره

ههههه اي نسيت فقره الشعر يكولون تزيد الشعر للام والطفل بس انصحج اخذيها تخفف الوجع بشكل مو طبيعي وبالنسبه للابره وجع ينحمل بس تحسين ممرتاحه يومين عبالك الابره مكانها مورم والقسطرن مثل صونده رفيعه
اكولج لا تفكرين هوايه تره لحظه ومنسيه والله وتكولين يا ريت تنعاد

حبيبتي مليون الحمد لله على سلامتج ويارب يوم اللي تحضرين ولادتهة انشاله وتشوفين خلفة خلفتهة والله يتمملج على خير ياارب

تسلمين حبي نونه منوره يوم اللي نقرا قصه ولادتج

حياااااااتي ام فطومه طبعا كتبت ام حواء ومسحتها ممتعلمه حياتي الف الف الحمدلله على سلامتج والله تممها للفرحه والله متتخيلين شصار بيه من اقره قصتج دمعت عيوني ودا اتخيل يا حبيبتي الله عوض صبرج الحمدلله والشكر الله يحفظلكمياها قرة عين ويخليلج اهلج وزوجج ياربي