هلو بنات السلام عليكم شلوونكم

مثل ما كلتكم ظل كلبي يلعب واتصلت بالمستشفى وكالولي تعالى ورا الاربعه

اني هم رحت وانتضار مو طويل الحمد لله

وصاحوا باسمي ورجلي ويايه طبعا

او مصاحت الدكتوره اسمي محبيتها شكلها مو مفرح كولش

واول مدخلت الغرفه كالتلي اي احجيلي ليش اجيتي

فدا اكوللها البارحه سويت سونار وطلع فرق 3 ايام تقريبا
جان تقاطعني وكللتي عادي ماكو مشكله 3 ايام مو خطر

كلتلها اي بس اني عندي حاله سابقه هم قاطعتني وكلتلي قريت اوراقج بالكومبيوتر
كلتلها اي وتعرفين معناها شكد اني قلقانه

كالت اولا سونار ما اسويلج
ثانيا انتي جايه بله سبب والنرويج عدهم طب زين وللاسف الناس تستغل المعامله الزينه مالتنا

فرجلي كولش ضاج كللتها تره هيه من السويد مو نرويج
كالت مبين من حجيها ولول السويد نفس النظام يعني كولش عنصريه وقهرتني

وكالت انتي عندج قلق اكثر من اللازم

وتكدرين تتفضلين للبيت

طبعا كلتلها ما اطلع سويلي سونار واتاكدي
من ورا خشمها كالت سونار سريع

سوتلي سونار كالت كولشي طبيعي يله كومي

كلتلها جم اسبوع
كالت 14-15 اسبوع
ضحكت والله ... كلتلها ادري بس اريد عدد الايام 14 وشكد

كالت ما اكولج لا تلحين دا اكولج طبيعي

ووجها ميكصه السيف
اني وجهي صار احمر من الضوجه ودا البس جاكيتي

جان تكولي راح اكتب لطبيبتج انه تدزج لابو امراض نفسيه يعالج القلق اللي عندج

كلت بكلبي بطرانه ذيج المره هم كلتولي روحي للبيت طبيعي واجيتكم كلتووولي سووووري ماتت البنيه

جان تكولي طالما ماكو نزيف او وجع لا تجين ابد

كلتلها ذاك الحمل لا نزيف ولا وجع

كالت اي تصير حالات نادره .. كلتلها اي وصارت ويايه لهذا افهمي اني قلقانه

وحتت من دا اطلع اصلا مكالت مع السلامه

وعاده عدنه طبيبات الحوامل كولش حبابات ويضحكون ويعاملون المريضه باحترام
بس حتى رجلي طلع ضايج كال هاي راح تسويلج مشاكل راح تكتب تقاير وتحولج اطباء حاله نفسيه
كلتله طز بيها همه روحوا البنيه من ايدي مو حقي كلبي نار

وهسه رجعت للبيت يعني نسيت موضوع الجاهل وضايجه من الطبيبه

ياعمري موكتلج قلقج هواااايو صح والله حقج اني حاسة بيج بس انتي اقري قران اكو احسن من القران يومية كولي ربي فوضت امري الك واقري البقرة والله كللللللش زينة بس اسمعي كلامي اني لوما اخاف عليج والله ما احجي وياج هيجي والله اني كل ما اقرة سورة البقرة الصبح انفخ اكول هاي لام حواء وهاي ايلاف وعلى نفسي وادعي لكل البنات والله

هسة اني مو حملت والحمد لله البارحة صافنة كلت خاف خارج الرحم اخاف عنقودي اخاف بي شي بعدين تعوذت من الشيطان وكلت الله ارحم بحالي هو الاعلم بحالي وعوضني على مصيبتي وكلت ربي مثل ما التزمت ورزقتني رح اظل ملتزمة حتى يولد سالم واشوفة كدام عيني وشلت كل الافكار الموحلوة من بالي والله الله اختبرج وشاف صبرج وهسة مستحيل رب العالمين ياذي عبده صدكيني ياعمري

ههههههههههه احسن طلعي قهرج بيها هاااي الزماله الحقيرة هههههههههههه

حبيبتي ام حواء هو حقج وتمام تتوهوسين عالطفل بس هذا قلق زايد احنا بينا هيجي طبيعة النسوان هو هم حقنا لانه اللي تلدغة الحية يخاف من جرة الحبل وانتي اللي شفتي مو قليل فحقج بهذا الحمل هيج توهوسين عالطفل بس مثل ماكالت ميوسة شيلي هالافكار من بالج وباذن الله النونو بخير وكلما تجيج افكار موزينة كولي سبع مرات حسبي الله ونعم الوكيل لانه في الحديث من قالها كفاه الله مااهمه من هم الدنيا فخلاص انتي بس كوليها وراح تحسين براحة بعدها لان وكلتي همج وطفلج لرب العالمين وهو ادرى مني ومنج ومن اطباء الدنيا كلها..وحقج تظوجين من الطبيبة واني ثبتلي ماكو طبيب يحس بشعور المريض الا مارحم ربي.

والله كلامج صح

حبيبتي لتضوجين صدكيني انتي قلقة اكثر من اللازم والله ماكو شي اقري ايات واتعوذي من الشيطان

والله يعينج على طبيبتج

حبي حقج اني من يمي ضجت من الطبيبة اسلوبهة كلش سخيف ظلي على طبيبتج بعد احسن حبي وحاولي تعوفين القلق والله يتكفل بحمايتة لحد ماتولدي سالم معافى يارب

اني كولش عاجبني اكتلها للطبيبة لان اني كولش اضوج من هيجي حالات وهيجي ناس تعبانين يتعيقلون ويستهينون بالمشاعر اوووف ياربي حبي ام حواء ابدي بافكار حلوه تفكرين عن البيبي وقلقج خلي منصب على كتلة الدكتوره اذاذ شفتيها مرة لخ هههههههه