اتوقعت اني اجهضت

هلووو بنات شلوونكم
البارحه كان يوم متعب ومؤلم وتعييس
كان عندي تحليل دم علمود نسبه هرمون الحمل ورحت سويته وعالسريع رجعت للبيت
واول مرجعت كنت تعبانه نمت ولما صحيت لكيت نفسي مصخنه وجسمي يوجعني
رحت تكرمون للحمام واشوووف دم وردي ينزل عليا صحيح مو كميه كثيره بس يعني اكو افرازات ورديه
خفت جدا وكلت لزوجي بنفس اللحظه غير ملابسه وكال خلينا نروح للطوارئ
كانت الساعه 6 ونص العصر
رحنا للطوارء وعدنا هنا سستم الانتظار يعني مو بسهوله واحد يدخل عالدكتور
وشرح زوجي حالتي الهم وخلونا ننتظر تقريبا ساعتين وبعدين اجه دوري ودخلت وحظي ذبني بدكتور متدرب جديد يعني يمكن هستوه متخرج
وكعد سالني مليون سؤال اخر دوره .. شكد الدم .. عندج وجع .. وين بالضبط ..الخ ...
كلتله سوولي سونار افضل من كولشي
رجعوا بالجديد سوولي تحاليل دم وادرار وكلي كولشي طبيعي
رجع فحص بطني وظهري بايده يعني اسلوب جدا متخلف يمكن جان يطبق الكتاب اللي دارسه
وبعدين بطلعان الروح كال راح اطلب من الدكتور المحتص بالسونار يسويله سونار
هذا الحجي صارت ساعه تقريبا 10 وربع بالليل واني على اعصابي
جان يجي الطبيب المختص عالسونار وجان السونار وياه
والمفاجاه ...... طلع الكتلوك وكعد يقرا شلون يشغله
المهم بعد معاناه شغله جان يطلع سونار مو داخلي .. وانما اللي يسووونه عالبطن
وظل يحاول يشوووف شي ومكدر يشووف اي شي بالكوه كال اكو كيس الحمل بس فارغ
بنفس الوقت يفحصني ويعلم هذا الطبيب الطالب يعني على اساس هوه اسطه
وخلص السونار ووصلنا الى نتيجه انه اني حامل بكيس بدون جنين
ازين نكوله اجهاض لو لا
يكول ما ادري ما اكدر احكم
بعدين زوجي كال عوفيهم اوديج لمشتسفى ثانيه
المشكله مال هاي المشتسفى ميدخلون اي احد الا تحويل من هاي المستشفى الصغيره ..لانه مستشفى كولش جبيره وبس تستقبل الحالات الصعبه
توكلنا على الله ورحنا ..والساعه 11 ونص
المهم زوجي جذب عليهم بالرسبشن وكالهم الدكتوره كالتنا اي شي يصير تجين
طبعا الدكتوره اللي ودلتني ببنتي وصدووك هيه هيجي كالت
المهم دخلونا راسا نوموني على سرير وتحاليل دم اخذوي مني وقاسوا ضغطي وتحليل ادرار
وما اكوللكم شلون ايدي اتزفت البارحه من التحاليل لحد هسه اكتب وتوجعني
كالولي لازم نحطلج مغذي عندج نزف ونقص سوائل وركبولي المغذي
وصعدوني على دكتوره نسائيه خفر همزين ماكو احد يمها وفارغه
راسا طلعت بالكومبيوتر القصه مالتي كلها لان مخزونه يمهم قرتها وكالتلي سوناررر داخلي لان حملج كولش بعده صغير على حساب الدوره وكلتلها اني اصلا حملي متاخر
المهم سوتلي قبل السونار مسحه وكالتلي ماكو دم وهايه افرازات عاديه تجي ويا الحمل
وسوتلي سونار وشافت الكيس وشافت الجنين بس كولش كولش كولش صغير
كالت يا دوب انتي 5 اسابيع و4 ايام حتى نبض ما شافت
حاولت هوايه وكالت ماكو نبض بس مو معناه اجهاض وانما الحمل صغير
وهوايه ارتاحيت من شفت اكو جنين عالاقل مو كيس فارغ وكالت اسبوع الى 10 ايام مفروض يبين النبض
والله كريم
ورجعنا للبيت ساعه 12 وربع واتفلشنا من التعب وطبعا اكو افرازات ورديه خفيفه
بس ما بيدي شي اسويلنا
وانتضر موعدي الثاني 9 اكتوبر
بنات ادعولي ربي يثبت حملي ويبلغني شوفته بصحه وعافيه
وان شاء الله كلكم حوامل يا ربي

والله ضحكتيني على الدكتور

حبيبتي لتوهسين وخليها ورة رب العالمين

الله يسلمج حبي

الحمد لله على السلامه

» كل من فقدت جنينها او اجهضت تتفضل

اتوقعت اني اجهضت

اتوقعت اني اجهضت

مواضيع مماثلة

مواضيع مماثلة