هلو حبي شكرا على الموضوع الحلو

بس ارجع من الدوام اكتب قصتي بالتفصيل

اوكي حياتي بالانتظار

هلو بنات شلونكم؟

راح ابدي اني اول وحدة

طبعا اني سوولي الولادة الاصطناعية بيوم 4/6/2012 والله شفت الويل بيها لان خلولي نفاخة بالرحم والنفاخة موصليها بصوندا طالعة برة والصوندا شاديها ببطالة متروسات مي حتى يجرن النفاخة للخارج وينفتح الرحم ويطلعون الاطفال وضليت على هاي الحالة تقريبا 15 ساعة واني ميتة من الالم بحيث بس ابجي والله واني جنت عبارة عن عودة من كثر الضعف الله يبعدنا عن هاي السوالف

المهم الممرضات بالمستشفى جانوا يكولون ان شاء الله بعد شهرين تجينا حامل مرة ثانية جنت اكوللهم والله والله بعد مااسوي اطفال جانوا يكولون لتحلفين بالله لان اول متطلعين من المستشفى تفكرين تسوين طفل

المهم طلعت من المستشفى تقريبا ورة 5 ايام فكرت اسوي طفل ( شوفو شلون كلمتي وحدة خخخخخخخخخخ)المهم كمت اراجع الطبيبة الولدتني كالت لازم 21 يوم الرجال ميقتربلج كتلها وبعدها يصير اسوي كالت يصير بس رحمج بعدة كتلها ميخالف اني اريد

بعد 21 يوم رجعت من بيت اهلي لزوجي طبعا بعد ولادتي صرت اموت على زوجي وحيل اتعلقت بي بعد مجنت كلما اشوفة هو وامة اتقيء ههههه

من هاي الفترة بديت احاول احمل ماكو

دورة اثنين تلاثة اربعة خمسة وماكو

واتذكر مرة اتقدمت علية 14 يوم

يعني صدك مليت وطبعا كل شهر اروح قبل الدورة بخمس ايام احلل دم ويكولون ماكو اني امووووووووت من اسمع هاي الكلمة

وقبل مااصير حامل بشهر راجعت طبيب مشهور يمنة انطاني منشطات هواية بالرغم من انه اني بيضتي جبيرة وكومة سوالي تحاليل ولزوجي تحاليل

اني تحاليلي مبيهم شي بس يمكن عندي اجسام مضادة وزوجي عندة التشوهات شوية عالية

بس كال لزوجي انت مبيك شي العلاج لزوجتك انطاني منشطات واني واثقة اني ممحتاجتهن المهم بديت اخذهن وبعدين من كيفي اخذت تفجيرير وهم مصار

البنات بالدوام كولش كاموا يحجون علية كالوا انتي دكرتي روحج يم الاطباء والسونارات بس مصاريف وتفكير وديلعبون بيج

وحدة من الموظفات كالت جربي بس هذا الشهر لترحين الاطباء وشوفي اني مقبلت المهم قنعتني وكالت ان شاء الله بعد متشوفين الاطفال اذا ترحين كتلها اوكي ماروح

وصلت ليوم 11 من الدورة بعد مااصبر خخخخ رحت للبنية قشمرتها كتلها اني عندي اكياس من المنشطات هذاك الشهر اني متأكدة لان حيل د اتأذى كتلها بس مرة وحدة اروح للسونار بالبداية كالت لا بس بعدين قنعتها كالت اوكي

فعلا رحت للطبيب بيوم 11 لكت عندي بويضة حجمها 18 ووحدة 11 ونص وزوجي طبعا خليتة يكطع التدخين وطلعت دوة من النت اسمة سيلمونيوم

ويوم 16 صار اباضة طبعا اني كل شهر متأملة عندي حمل ماعدا هذا الشهر مااعرف ليش

بعدين قبل الدورة بأسبوع نزل شوووية دم بس مجنت متأكدة هذا دم وجنت مصرة مااسوي تحليل دم بالرغم من انه ماما واختي كلما يشوفوني يكولون عدنا احساس انتي هذا الشهر حامل

المهم قبل موعدها تقريبا بخمس ايام كعدت ساعة 2 ونص بالليل طلعت اختبار منزلي اسمة كلير ساين جايبيلياه من الاردن وسويت بديت اشووووووف خيال للخط الثاني اني مصدكت والله كمت اكمز وحدي ورحت كعدت زوجي كال وينة وينشاف شوية عاد صار واضح رحت كعدت خالتي ام زوجي طارت من الفرح وياية

طبعا الليل كلة منمتة من الفرح

كعدت الصبح جان مصاجف واحد محرم رحت سويت دم طاع اكو حمل بس خفيف لان بداية

والحمدلله والشكر والله لحد الان ممصدكة وربي يتمملي حملي على خيررررررررر يارب

تسلمين حياتي ام حواء ويخليلج ابنج بحق محمد وال محمد

تعرفين احس ميوسة هم بيها ولد وياربي احساسي يصدوك

يا حبيبتي ام حواء قصتج جدا مؤثرة وتفاعلت وياج وكاانه داعيش القصة .. الله يفرح كلبج يارب بشوفة طفلج سليم معافى ولا تنقهرين على جهالج اللي راحو لانه راح يدخلوج الجنة صح شوفة الجاهل بالدنيا ماكو شي احلى منها بس اذا كان حرمانك منها راح يدخلج الجنة فتسوى وبااذن الله عن قريب تشوفين ابنج بين احضانج وينسيج كل هالايام اللي شفتيها والمعاناة اللي عانيتيها وانتي كذلك ايلاف الله يعوضج يارب ونفس الكلام اللي كلته لام حواء اكلج ياه وباذن الله جهالج ذخر الج بالاخرة وسبب دخولج للجنة ياعمري وباذن الله اشهر قليلة وتشوفين طفلج بين احظانج سليم معافى.. آآآآآمييييييين يارب العالمين

حبي ام حواء ياربي يعوضج بهذا الطفل ويخلي الج

حبيبتي نور الهدى اشكرج على مشاعرج الصادقة وربي يكتبلج الحمل قريبا ان شاء الله

تسلمون حبابي على دعواتكم الحلوة

السلام عليكم

ام حواء كلش حلو موضوعج واني هم راح احجيلكم قصتي....

اني تزوجت بتاريخ 27\3\2009 وطبعا ظليت سنة ما صار عندي حمل وبعدها بديت اراجع وكالو ماكو شي لا اني ولا زوجي المهم ظلينا ناخذ علاج لحد ما صار عندي تكيس وراها بديت بعلاج التكيس والخربطة المهم فديوم الدكتور كال هاي صاير عندج كيس وبعد كم يوم هم رحت جان يكول انتي هسة عندج بيضة حجمها زين ولازم اسويلج تلقيح صناعي حتى يصير حمل ويعالج كلشي المهم سوتها وطبعا فشلت وما احجيلكم شنو النفسية الزفت اللي مريت بيها....

بعدها كاللعد لازم عملية لان هذا الكيس اذا ظل بعد ماتنزل الدورة ولا تكدرين تحملين

اني رجعت للبيت بجي ولطم وبعدها فوضت امري لرب العالمين وره شهر صار عندي التهاب رحت لدكتور حتى اخذ علاج جان يكولي ليش ماتسوين اشعة ملونة على الشهر الجاي اني هم سويت وسبحان الله الله شاء وصار الحمل بنفس الشهر وكملت الحمل صح متاعب الوحام والثقل والام وبالشهر السابع امي توفت الله يرحمها ياربي

وانكسرت فرحتي بوكتها ....

المهم دخلت بالشهر التاسع وبدة عندي الضغط كلش يصعد بحيث يوصل 19 او 18 بحيث ما انام من وجع الراس واخذ الدوميت 3 اوقات ومهدئات وماكو فايدة ويوم 8\3 الدكتورة كالت السبت اخلج عمليه لان بعد ما نجازف اكثر ورحت السبت بتاريخ 10\3

وطبعا جانت الفرحة ماليه كلبي من راسي لقدمي وابد ما جنت خايفة من العمليه جنت بس افكر شلون راح اشوف بنتي وشلون ابوسها والطريق كله هذا تفكيري وصلنا المستشفى ودخلت الغرفة مالتي واجتي علية الممرضة وكالت استعدي وحضري ملابس الطفل واني هم طلعت الدشداشة والجواريب والكماط وكلشي واخذتها بايدي ورحت لغرفة العمليات وطبعا الفرحة حتى نستني اسلم على زوجي وخالتي واختي رحت ركض..... وطلعت من العملية شوية فاكني البنج وسالت البنية حلوةة يكولولي ايييي تخبل.... اكول لزوجي اذنت باذنها كال اي.... كلت وينها شو مدا اسمع صوتها ليش ماتبجي جان يكولولي اخذوها للحضانة حتى يفحصوها ومن تفيقين زين نجيبها.... بعد ما فقت منا لبنج جان تجي دكتوتي هاااا شلونج كتلها اريد بنتي ليش محد يقبل يجيبها كالت البنية صار بيها شوية تشوه ماتكدرين ترضعيها وديناها لمستشفى ااطفال حتى يسوولها عمليه حتى ترجع وترضعيها.....اني دكيت ولطمت كالت علكيفج لايصير عندج نزيف واني اكول كله من ورايه لان اخذ حبوب الربو المهم

طلعت من المستشفى وما احجيلكم شنو الاحساس اللي بيه واني طلعت وبنتي مو بيدي ورجعت للبيت وظليت3 ايام واني اسال زوجي على اساس هو اللي جان يروح يشوفها هااااا شفتها يكول اي اكوله شلونها يكول تعبانة اكوله شوكت يسولها عملية يكول بعد لان تعبانة المهم وبذاك اليوم المشؤوم الخميس كالولي البنية اصلا اجتي ميته جانت ميته صارلها 24 ساعة قبل العملية

وبعد ما اكدر اكمللكم على الشي اللي صار بيه والدكتورة كالت بعد ما تسوين طفل منا لحد ماتكملين 6 اشهر والحمد لله كملت على خير وراها بديت احاول على الحمل وانتو كلكم تعرفون قصتي والحمد لله عوضني عن اللي راح ورزقني بالحمل والله يتمم عليه بالخير وعلى ام حواء وايلاف بالخير ويرزقنا الحمل السليم المعافى

ويرزق شوشو ونونة ونور الهدى ونور فاطمة ودودو بالحمل بالقريب العاجل يارب

وهذي قصتي كاملة والحمد لله

حبي ام حواء الله لا يوجع كلبج ويفرحة للدوم وتشوفين ضناج بصحة وعافية يارب والحمد لله الله عمر كلبي بالايمان وعوضني خير واله يتمملنا على خير بحق هذي الايام

والله عصرتو كلبي وبجيت الحمد لله والشكر الله عوض صبركم خير والله يكمل الفرحة عليكم يارب وتكومون كلكم بالسلامة ان شاء الله ياربي بحق هاي الايام ويرزقني ويرزق البنات نور الهدى ودودو ونونة ونور فاطمة والكل يارب

ياعمري ...شوشو الله لا ينزلج دمعة الا للفرح يارب ويرزقج بالقريب العاجل بالحمل السليم السهل ولكل وحدة من البنات

والحمد لله على كل حال.....

حبيبتي ميوسة الحمدلله والشكر رب العالمين عوضج وان شاء الله تشوفين بحضنج اجمل طفل

تسلمين كلبي ويحميلج جنينج وتولدين بالسلامة