السلام عليكم ورحمه الله وبركاته
اخواتي العزيزات انا انضميت الكم لانو حابه اعرف جواب لسؤالي اتمنى الردود من حضارتكم باسرع وقت
انا كنت حامل ولكن للاسف الطفل توفى قبل ولادته بيوم وصار على ولادتي 6 اشهر والدكتوره سمحتلي ان احمل قبل شهرين لكن الدوره الشهريه تتأخر عن موعدها وبعدها تجي ويطلع ماكو حمل لما رحت للدكتوره قالت ان وضعي طبيعي ومااعاني من شي ... للي مر بنفس التجربه حابه اعرف بعد كم شهر ممكن يصير الحمل مع العلم انا حملت بطفلي بأول شهر من زواجي .. شكرا جزيلا

وعليكم السلام حبيبتي اول شي نورتي المنتدى ويارب يكون وجه خير عليج
لان ماشاء الله هوايه بنات بس سجلو بالمنتدى صار عدهم الحمل
وثاني شي اريد اعزيج على فقد طفلج والله يعوضج عنا يارب وان شاء الله اجرج كلش جبير عند الله وان شاء الله الله راح يعوضج بالجنه عن طفلج صح الضنا غاااااااالي بس الجنه اغلى
واني والله ادري بيج وحاسه بيج وانتي كلما تذكرين طفلج كولي اللهم اجرني في مصيبتي واخلفلي خيرا منها وهسه تشوفين شلووون الله راح يعوضج بطفل وينسيج كل اللي شفتيه
وترى هنا اكثريتنا فاقدين اطفالنا واكو الحمدلله من عدنا صار عدهم طفل مثل صديقتنا لولة الحمدلله الله عوضها ابرهومي الله يحفظه يارب وباقي البنات الحمدلله حوامل ويااااارب الله يتمم حملهم على خير ويعوضهم عن اطفالهم اللي خسروهم واحنا هم اللي بعد ماصار املنا بالله جبير الحمدلله والشكر وهو اللي راح يعوضنا ويفرحنا وانتي هم ويانا يارب
وبالنسبة للاخت ميوسة هي مثل حالتج بالظبط هسه تجي وهم تحجيلج هم بنتها توفت بيوم قبل العملية والله يعينها بس هي ماشاء الله صابرة واكيد هم تذكرها بس هي ماشاء الله ايمانها قوي والحمدلله الله عوضها وهسه هي حامل وادعيلها الله يتمملها على خير
وهي لان جابت بعمليه فالدكتورة اول ست اشهر منعتها من الحمل وبعد الست اشهر ظلت شهرين هم ماجان يصير عدها بعدين الحمدلله بعد فقد طفلتها ب8 اشهر الله رزقها بالحمل
وان شاء الله هي تجي وراح تحجيلج عن تجربتها وباذن الله تستفادين من خبرتها
وبس هي هم لزمت الاستغفار وقيام الليل والحمدلله الله عوضها
فانتي هم حاولي تكثرين من الاستغفار والله يرزقنا جميعا
واعتذر لان طولت عليج بس والله لان كلش تاثرت بقصتج واتمنى يارب هالشهر يصيرلج الحمل
واني متاكدة راح تستفادين من خبرات البنات ودعواتهم احنا هنا الحمدلله عائلة وحدة ووحدة تريد الخير للخ وتدعيلها
وانتي هم ان شاء الله ماننساج بدعواتنا
سلامي الج حبيبتي والله ينطيج لما يرضيج

السلام عليكم اخواتي العزيزاات شكرا جزيلا الكم لان جاوبتوا على سؤالي وعلى دعاءكم الي جزاكم الله الف خير ومااعرف اشلون اشكركم الصراحه طمنتوني وقللتوا من توتري اني على طول الوقت متوتره واعصابي تعبانه كلش وحاسه نفسي كبرانه 20 سنه مع العلم اني عمري 23 سنه فقط بس الصدمه كانت شديده وقاسيه وشي مامتوقع والي ديأثر عليا اكثر ان كنت متوقعه رح اصير حامل شوكت مااريد بس تفاجأت ان مدا يصير حمل واسألكم الدعاء وشكرا جزيلا لتوضيح نور الهدى ولام حواء ولميوسه وانشالله الله يتمملج حملج بالف خير ويفرح قلبج بالنونو الجديد ..
وحبيت اتاكد من ميوسه يعني عادي تتاخر اني دااكول اخاف خلل بالهرمونات او حليب بصدري فمدا يصير حمل تره اني اوهس وخايفه كلش واني هم جبت النونو عمليه فاريد اطمئن اكثر لان اعصابي تعبت ..
تسلمولي عزيزاتي

حبيبتي دموع الورد الشكر لله واحنا فرحتنا يوم اللي تجين وتبشرينا بحملج ياااااارب عن قريب
واني اكول روحي جيكي هرموناتج انتي ما خسرانه شي خصوصا مال حليب لان انتي جنت على ابواب ولادة ومية بالمية اكو حليب بصدرج اني بنت عمتي توفى طفلها ورى الولادة بيوم وهم طلع عدها حليب واخذت حبوب وصار عدها حمل ورا الولادة ب 6 اشهر واكيد الحالة النفسية هم تخربط الهرمونات فانتي حاولي من تجيج الدورة وان شاءالله ماتجيج وتطلعين حامل بس اذا جتي فالاحسن تسوين تحليل الهرمونات ثاني او ثالث يوم بالدورة وان شاء الله ماعندج غير العافية

السلام عليكم اخواتي العزيزات طبعا متصورون شكد كلامكم مشجع وينطي امل خصوصا للي مثل وضعي
وبالنسبه للحليب اني بعد العمليه كتبتلي دكتورتي على حبوب تنشيف الحليب بس اخذت منهن 3 فقط لان كلش اذني سببلي صداع ودوخه كلش قويه وحتى اريد اتقيء فضطريت اتركهن ولما سألت دكتورتي كالت ميخالف ماطول اخذتي منهن واصلا ماكو رضاعه ميبقى حليب وهي حتى هاي الاشهر مدا تقبل اسوي اي تحليل مال هرمونات او حليب لان دتكولي مابيج شي ..
عزيزتي ميوسه بس حبيت اعرف شي منج اني قبل ماابدي بمحاولات الحمل من بعد 4 اشهر من الولاده كانت الدوره منتظمه خلال هاي الاربعه اشهر اشو من بديت اريد اصير حامل كامت تتاخر اول شهر اتأخرت 14 يوم والشهر الي بعده تأخرت 5 ايام وهسه هذا الشهر حاليا متأخره اسبوع وحتى محابه اروح احلل اخاف يخيب املي ويطلع ماكو حمل مثل الاشهر الي راحت .. اتمنى منكم متنسوني بالدعاء وجزاكم الله الف خير وشكرا لردودكم نور الهدى وميوسه ..

مرحبا عزيزاتي كيف حالكم انشالله الجميع بخير
حبيت اسألكم سؤال واعرف ان اسالتي هوايه بس شسوون تحملوني ..
اني الدوره فايتتني صار 15 يوم وماكو اي عرض من اعراض الحمل الي صارت بيه بذاك الطفل وحتى اخاف اروح احلل ليخيب املي ويطلع ماكو حمل والصراحه مااتحمل بعد خيبات الامل والي مزيد خوفي ان بأول شهر انسمح الي ان اصير حامل بعد ولادتي هم تأخرت 14 يوم ورحت حللت طلع ماكو حمل وراها ثاني يوم نزلت .. بس قسم ديكولولي ان حمل عن حمل يفرق يعني اول بطن مو مثل ثاني بطن .... الخ .. فحبيت اعرف منكم صحيح هذا الكلام .. واتمنى متنسوني بالدعاء وانشالله ربي ماناسيني ويفرح قلبي هالشهر .. وشكرا

تسلملي ام حواء على دعواتج الحلوه .. للاسف حللت وطلع ماكو حمل ومااكولكم على البجي الي صار ولحد الان الدوره ماكو والحمدلله على كل حال ... ونسألكم الدعاء

مرحبا عزيزاتي كيف حالكم انشالله الجميع بخير .. حبيت بس اطمئن عليكم ...

حبيبتي دموع ربي يساعدج نور الهدى الوردة وميوسة مقصرو وياج بالاجابة واني لوله هم فقدت ابني بنهاية شهر السابع من الحمل وظليت وراها اتلوع 6 شهور يلة حبلت واخذت حبوب تنشيف الحليب 4 ونشف الحليب وكامت الدورة تتخربط تتقدم وتتاخر رغم جانت منتظمة وماشفت غير ربج فرجها وجبت برهومي يوم الج حبيبتي ربج مياخذ شي الا يعوضج بالاحسن وبعدج صغيرة حياتي العمر كولة كدامج وانشالة تسوين درزن جهال واعتذر جيت متاخرة

تسلميلي لوله على دعواتج الحلوه وربي يخليلج برهومي ويحفظه الج ....اي والله البنات مقصرو ويايه واني اشكرهم جزيل الشكر بس ميوسه ماكو وحابه اطمئن عليها ... اني هسه دخلت الشهر السابع وهم ماكو حمل ومدااعرف شنو السبب هسه داانتظر تحاليلي وانشالله ماكو شي بس الانتظار متعب وصعب حيل تصورت ان الايام كفيله ان تنسي الانسان بس طلعت غلطانه يوم عن يوم وضعي ديصير اصعب والي صار بيه مدا يروح من بالي وخايفه لا مااصير حامل بعد وساوس هوايه دتجيني خصوصا ان الدوره الاخيره منزلت الا ضربت ابرة اختبار يلا يعني وره 23 يوم عن موعدها