السلام عليكم بنات

اريد اسولفلكم اليوم الصبح صار وياية موقف وية اعز صديقة بعد غيبة من ايام المعهد والدراسة افارقنا وهي تزوجت وانكطعت اخبارها اليوم جنت بالرواد واشوفها اني سمعت عنها انه صار عدها بنية فبل فترة ......فمن شفتة تباوسنا وسلمت عليها لان جنت حيل مشتاقتلها

المهم دا تسالني مصار عندج شي فسولفتلها على حالي كالت خطيه وما تستاهلين وهسة مصار شي كلتلها لاااااا بعد اني قبل شهرين يلة الدكتورة كالت يصير تحملين لان جنت مسوية عملية ميصير احمل بذيج الفترة

فاجة رجلها وشايل البنية فكلتلها اووووووي شكد حلوة بعد ما مكملة الله يخليها كالت الرجلها ((اخذها وروح اشتريلها كال مو اشتريتلها كالت دا اكلك اخذها وروح))وطبعا تباوع عليه

اني كلش انقهرت كلت هاي شبيها خالتي طلعت من المحل فدا تسلم عليها كالت اني كلش تاخرت مع السلامة

هاي شبيها العالم هاي عود اعز صديقة شنو اكل اطفال واني ما ادري والله كلش انقهرت اني شبيدي قابل قابل اني كتلت بنتي لو ما اريدها

خليت عيني بعينك ربي وفوضت امري الك وتاجرني على مصيبتي وتفرج همي وهم ام حواء ولوله وايلاف وتفرح شوشو وكل محرومة يارب ولاتشمت اعدائنا بمصيبتنا

ياااااااارب

لاحول ولاقوة الا بالله هاي شبيهة الناس شنو ماظل قلب عدهم لو خلص يعني مشايفين جهال بحياتنة حبي لديرين بال لهيجي نماذج والله يرزقج ويسكت هيجي ناس

لا حول ولا قوه الا بالله واني بعد ما استغرب من هاي العالم والله
الناس كلها تخاف من العيون والحسد

اني هم قبل فتره شفت بنيه اعرفها مو علاقتي طوخ بيها يعني سلام وسلام عليكم
فمن اخر مره شافتني كالتلي مو جنتي حامل جبتي صلوات كلتلها لا هيجي وهيجي صار
المهم انقهرت
ورا تقريبا شهر ونص شفتها منفوخه البنيه
كلتلها شنو حامل ..كالتلي لا ..كلتلها عززه صايره طوبه كالت اي سافرت اسبانيا وكله شمس واكل وبحر

هذا حجي قبل شهر بالضبط
وقبل جم يوم شفتها بطنها مبينه مال بالرابع لو بدايه خامس
بس هيه مشافتني واني غيرت طريقي

فلا تتفاجئين هس يجي يوم يصير عندج جهال وانتي هم تكومين تخافين عليهم من العين
وتكولين كالت ام حواء
خو مو احنا الفاقدين اطفالنا ملائكه والناس اشرار
وانتي حمدي ربج وشكريه حملتي وكملت اشهر الحمل لو محبلانه جان شكالت العالم
جان حتى متباوست وياج صديقتج والله اعلم
صح كلامي لو لا

؟؟

والله كلامج صح ام حواء بس يعني اسوي هيج ماادري اني بالنوع اللي بكلبي على لساني

بعد ما ادري اسويها لولا بس كلامج والله صح بس الموقف جان كلش صعب واني منا نفسيتي زفت من الجمعة لحد هسة والمصايب نازلة ترف عليه وهاي جتي كملتها يلة الله موجود واعلم بحالنا

الله كريم عمري وخلي عينج بعين الله

حبي شوشو الله يبعد عنج هيج ناس ما عدها ايمان بالله

ام حواء اني ما عندي غيره

الله يسمع منج

يارب ولكل محرومة

حبي ميوسة لتديرين بال والله اني اضحك على نماذج مرضى

ههههههههههه اي والله ايلاف