ذكــــــــــــــــــــ♥ـــــــــريات الطـــــــــ♥ـــــــفوله
هلو حبايب اليوم موضوعنا على ذكريات الطفوله
وشكد جنا نسوي اشياء حلوه من جنا صغار وخصوصا ويا اخوانه وهسه كبرنا وصار كل واحد ملتهي بحياته
طبعا اني عندي اخت وحده واخ واحد واثنينهم اصغر مني
وقبل شويه جنا نسولف اني واختي ونتذكر شنو جنا نسوي من جنا صغار وحبينا نشارككم بمغامراتنا
يله استعدوا للضحك ههههه
طبعا امي جانت تداوم فاحنا طول النهار بالبيت اني واختي لوحدنا بالبدايه جنا نروح كلنا امي تودينه الصبح مربيه والعصر تجي تاخذنا بعدين المربيه انهزمت من عدنا بس كامت تاخذ اخويه الصغير
فاضطرينا نبقى بالبيت
جنا نرش البيت كله بالمي ونفرغ باكيت التايت ونشد صابون برجلنا ونلعب تزلج بالهووووووووووول وقبل لا تجي امي بشويه نرجع نجيب الصونده نغسل الهول ونجره بالماسحه ونخلي البنكه على اعلى شي علمود ينشف
ثاني شغله عدنا كراسي بالحديقه اللي تصير بيها مثل حبل بلاستيك جنا نكلبهم ونجيب جراجف نغطيهم ووحده تكعد علساس الملكه والثانيه تدفع الكرسي علساس الخدامه وكلساعه نبدل
الشغله الثالثه نجيب الالوان المائيه ونسوي حمره وكحله ونلغمط وجهنا كله وساعه وردي وساعه احمر والمشكله لون اسود مينمسح بسرعه وعيونه تصير حمره ونخاف قبل لا تجي ماما
الشغله الرابعه جان عدنا دبدوب جبير فد مره كطمنا راسه وركبنا عالماسحه ولبسنا الماسحه دشداشه خضره هههه وسميناه عمو دبدوب وفد يوم البيت صنطه وعمو دبدوب بالمخزن وجان تتزحلك الماسحه وصار صوت وكمنا نخاف ونكول بي جني وخلينه امي تشمره هههه
ومن مغامراتنه نصفط كل الفرش مال بيت واحد فوك اللاخ وطفر من القنفه يعني سقوط حر هههه ومن غير الجقلمبات ونفتر بالهوا بالجقلمبه
وخطيه امي المسكينه لحد الان عبالها بناتها جانوا ملائكه من همه صغار
يله ماما لا تخافين كبرنا والحمد لله بدون كسور ^^
ومشى الزمن وراحت هالالعاب الحلوه هسه اختي الصغيرونه ما شاء الله اتخرجت طبيبه
واخويه الصغيرون بالجامعه
وان شاء الله الموضوع عجبكم
ويا ريت تسولفولنا على مغامراتكم