ههههههههههههههههههههه اول مره اسمع هالسالفه

سلام عليكم شووو اكتب وماحد يرد علي او محد يسأل ليشششششششش


شلونكم يا حوامل وشلون حمل والبيبي ان شاءلله بخير!
قريت عن انكم تحلمون مثل حيوانات وغيرها

خلي اسولفكم
انا دايما احلم هاي احلام ودايما حشاكم كلب او بزونة او نسوان كلها لابسة اسود ومرات احس جسمي يتحرك مادري شنو هاي حتة اكعد انا خايفة وانا نايمة ابجي وزوجي يكعدني من نوم ف ضليت هشكل ساكتة علنفسي وكنت كل ما اكعد اذبلي صدقات وبعدها اب 3 سنوات حملت وصار الحمل بس 3 اشهر وطفل توفى
ف اتصلت على عمتي ام زوجي كتلها هشكل كالت انا راح اخذلج عند سيدة خيرة وهوا يشوف ف شافلي كال عندي تابعة وسبب حمل يلي صار اسغاط منها ودورة متخربطة منها والم بضهر منها وكلها صحيح والله تفاجأت من كالها ف عمتي كالت لازم نسوي شي سوالي حرز دايما اشيلة وحرز ثاني لازم اسبح بس ف والله والله الحمدالله وشكر كلشي ماكو الحين حتة احلام هم ماكو مو مثل قبل و الحين تقريبا راح اخلص من غسيل من الماء بس جمعتين و 2 الأثنين والحمدالله ماتدرون شلون نفسيتي مرتاحة والحمدالله وحتة الم وقت الدورة مو مثل قبل ف الحمدالله



بنات انصحكم لا تجاهلون روحو عن السيد او شيخ وشوفو ماراح تخصرون شي بس انو تطمنون لا اكثر ولا اقل وكولولهم على هذة احلام وصدقو هوا يلي يساعدكم ومابيها شي

هلو حبايييييييييييييييييييب شونكم حيل مشتاقتلكم تعذروني كللللللللللللللللللش مخبوصة نوم مدانام يعني اذا يصير فراغ يادوب احط راسي عالمخدة
برهومي  كلساع اعقم عينة  شاي دافي لان شوية  ملتهبة يكولون عادي هاي وخشمة يرشح فاشربة بابونج دافي وظهري مكسور بالرضاعة لان تعرفون عملية وكوة احطة بحضني وارضعة والحمد لله راح منة ابو صفار وطبعا اذا فرغت يادوب احط لكمة بحلكي لو اعقم جرحي لو اروح للحمام وتدرون الليل كلة يبجي لان بعده ابن نفاس فيومية سهرة واني والدتي متوفية وماعندي غير ام زوجي خطية مقصرت وفرحت بيه هواية بس ظهرها كام يوجعها لان مرة كبيرة فزوجي رجعني لبيتنا وخايفة بحدي وية الطفل اني تعلمت احفظة واغسلة واكمطة  بس هم اكو خوف اكول لو عندي ام جان جتي دارتنا سوية كلما اتعب اكوم ابجي لان حيل محتاجة الام وتمنيت لو عايشة وية عيالي جان زوجي مجبرني نرجع ادعولي عفية تعدي هالايام بسرعة ويخلص الا ربعين ويقوى واطمئن علية  انتو شونكم وحدة وحدة ملحكت اقرة حجيكم ام حواء وميوسة وايلاف شونكم وية الحمل وشخباركم  باقي البنوتات دودو ونونة وشوشو ونور الهدى ونور فاطمة شخباركم  حيل مشتاقة اسمع اخباركم

شكرا قلبي ام حواء والله دمعت عيني واقرة ردج والله راسا اتذكرتكم كلت لعد ام حواء  شتكول وباقي البنات من ربي يكرم عليهم هم شيحيكولون  الحمدلله والشكر على كل حال والله يفرح قلبج حياتي انتي شخبارج هسة شكد صرتي؟والنونو شخبارة ؟وضغطج شونه  طمنيني

هلا ام حواء
والله انا ماكدر افتحة صعب وثاني شي عندي ثانية حاطيتة بلماي ف ما اكدر اشوفهم وانتي تكدرين اذا عندج احد بلعراق تكوليلهم يسوولج وخلي يدزولجيا بيد احد والله يفيد وثاني شي انا من احمل راح اسوي وحدة ثانية علمود الحمل لازم اسوي حتة يحفظ الجنين ويتمم علي

لولة الف الحمدالله على سلامتج ويارب تكومين بسلامة ان شاءلله والله يساعدج وكلها كميوم ويتعدى الله يسهل عليج

هلوووووو بنات هاااااااي شكد مسولفين؟؟؟؟؟

اول شي خلي اسلم على لولة واكوللها حبي ترى حيييييييييييييييل مشتاقيلج والحمد لله اطمنا عليج وعلى برهووووووووم

وحبي ليش تعقمين الجرح ليش ماملتهب لوووو هيج اني بس من رفعت الخيط مرة وحدة عقمته وثاني يوم سبحت وماكو اي شي اصلا كمت كللللش طبيعي اتحرك؟؟؟؟ حبي عندج العافية انشء الله

وبالنسبة لحملي الحمد لله بس عندي الضغط كللللش متعبني واني رحت لدكتورة ريا واطتني الدوميت 3 اوقات ودا اقيسه كل 4 ايام وهسة الحمد لله زين وية الاسبرين....

...........

بنات بالنسبة للتابعة اني عندي وكطعتها بفضل رب العالمين

من جنت بذاك الحمل احلم احلام موزينة نسوان يخوفون عود يكولولي الا ناخذ طفلج ويفوتون ايدهم عود بطني واكعد اعيط لو افز بنومي واكوم اضرب بزوجب خطية وهو يكعدني....لحد ما صار اللي صار

واستمرت عندي الحاله ولحد قبل شهرين رحت لشيخ وسوالي روقية خلة على راشي قطعه خضرة مكتوب عليها اية الكرسي واسماء الائمة ال12 وظل يقرة ايات لحد ما كمت احس بشي بطني كام يتحرك عبالك نمل ونزل على رجلي ومن اصبعي الكبير صار يوجعني وبالعودة مال الشيخ ظل يضغط ويقرة لحد ما ارتاحيت....

وكال اقري يومية اواخر سورة البقرة يعني من اية 284 لحد نهاية السورة اقراها واطاني ورقة كال هاي لو تقريها يومية لو تشيليها وهي مكتوب بيها الائمة ال12 والقلاقل ال4

واية الكرسي واخر سورة الحشر من الله لا اله الا هو الرحمن الرحيم الملك القدوس ولنهاية السورة...

وبالاضافة كال التسبيح ثم التسبيح...والمواضبة على الصلاه بوكتها يعني بدون تاخير...

وهاااااا كتبت بسم الله الرحمن الرحيم 1000 مرة وخليتها مثل الحجاب وشلتها بس من انام اذبها....

وكلت احسن ما اقرة نهاية البقرة خلي اقراها كلها لان البقرة تطرح البركة وطرد الشياطين وكل مكروه من الجن والانس وتفك السحر وتبعد التوابع وتزيد الملائكة العمارة بالبيت وام حواءتدرين تكومين تكرهين الاغاني وكل شي يغضب رب العالمين اني بس اشوف اغنية او شي موحلو راسا استغفر ربي واكلبه وطبعا القران ما يطفة بغرفة انوم لحد ما اصعد انام

والتسبيح والحمد لله يومية اني هسة اكعد اصلي قيام الليل والله رمات اكول اليوم مااكوم مابيه حيل عبالك احد يكولي دكومي احسنلج فاخافواكوم راسا اتوضه واصلي والاحلام كلها راحت وهسة الحمد لله كلها احلامي حلوةوالحمد لله والشكر ويوم اللي ما اقرة سورة البقرة كلش اضوج

يابنات والله بس التزمو بسورة البقرة والتسبيح وشوفو شلون ترتاحون وكتبو الايات اللي كتلكم عليها وشيلوها والله يبعد عنكم كل مكروه يارب....

ام حواء هاااااي صح مال الاربعين والجبسة واللي تريد اوللها وصفات لفك الجبسة وبنات اكو طوس تصير مكتوب بيها سورة يس تعرفوها؟؟؟؟؟

هاي وصو احد خلي يجيبولكم وهاي دائما اغسلو بيها وخصوصا بايام التبويض وترى هاي عن تجربة وهذا الحمل هم طلعتها وغتسل بيها وسبحان الله بنفس اشهر صار الحمل....

واي استفسار كولو..... بنات ترى اني علوية يعني اصلي سادة فاي شي تريدون كولووووو

حيااااااااااااااااااااااااتي ميوووووووووووووووووووووسه هاي شكد تعرفين هيجي اموووور
اني اموت على هالسوافل واخاف منها بس ما اعرف

تدرين راح اسوي الاشياء اللي كلتي عليها

باعي اني عدني مشكله وراح احجيها الكم بجون مستحى
اظافيري دائما مصبغه
فحتى لو اغسل جنابه كالولي قبل فتره انتي تبقين مجنبه مدام مماسحه صبغ الاظافر
وهذا طبع ادمان لازم اظافيري مال رجلي وايدي مصبغه

فمن اريد اقرا قران مثلا استحرم الزمه لازم اكوم امسح الصبغ واسبح خصيصا علمود اقرا قران
صلاه بصراحه اني مو كولش منتظمه عليها ودائما ادعي ربي يهديني
ومن اصلي مصبغه واصلي

واكيد غلط بس زويج من نوع كولشي ينتقد يعني لازم 24 ساعه مكيجه ومصبغه ومبدله شي مرتب بالبيت

وينتبه على كولشي
يعين حتى صلاه ما اكدر بوقتها لان الظهر اكمل الغدا اسبح واتمكيج والبس فد كلابيه لو دشداشه حلوه
وابقى لليل هيجي
يعني تفوت صلاه العصر والظهر والمغرب والعشا ويجي نص الليل واني هيجي
واغلب الاحيان بعد يجي الليل وتعرفون شيصير بعد اصير مجنبه رسمي
مرات اسبح ومرات اتعاجز اخليها للصبح
وهم يكولون مو زين لازم وحده تسبح راسا بس عندي جيوب وشعري ثخين مستحيل اكدر اسبح بنص الليل وانام

فاموري متخربطه من هالناحيه ومن اتزوجت لليوم ابد لا ضبطت صلاه

هلوووووو بنات
نور فاطمه هلو حبيبتي شونج ياربي الله يعوضج بالاحسن ويحفظكم ان شاء الله خليها وره الله
لولو حياتي كولش فرحت من قريت ردج واكيد كولش مشغوله حقج والله يساعدج ياربي والله يرحمها لامج حبي هيه محد يعوضها بدون نقاش وعلى كولة ام حواء احنه شنكوول لا ام لا اخ لا اخت والله كل كم يوم تلكيني اطك بجي وخنكه هلكد ما احتاجهم واشتاقلهم مع العلم شكد اتصالات خطيه بس صعبببببة الغربه وبس شغل متحسين بلمة الاهل ولا حتى بالعيد ولا اي شي خليها سكته
ميوسه والله تعرفين كومه شغلات بهالمجال وخوش شغلات ذكرتيها ماكو احسن من القران علاج لكل شي بس شنكول اعوذ بالله من الشيطان الرجيم

طبعا ام حواء الي رجعه على كلامج لان هسه لازم اشتغل ارجعلكم فد شويه

حبي ام حواء هذا الشي ابد ما يجوز الصبغ يبطل الوضوء والصلاه وبالنسبة للاغتسال اني ماادري انتي شلون تغتسلين ؟؟؟؟

يعني مو الا تبللين شعرج هواية...

رح احجي عن نفسي اني من اغتسل اني استعمل الطاسه اللي مكتوب بيها يس..اخليها بايدي اليمنى واكول اللهم اجعلنا من التوابين ومن المتطهرين اللهم اني اغتسل من الجنابة وحولها بايدي اليسرى ودير على كتفي اليمين 3 مرات وبعدين اخليها بايدي اليسرى وهم اكول الادعية وحولها لايدي اليمنى وادير على كتفي الايسر هم 3 مرات

وبعدين اصلي على النبي 3 مرات واني ادير على راسي وبس فمو كلش يتبلل الشعر وتغسلين المنطقة وهايهية

وهسة اني هم من اكمل شغلي الظهر اسبح واتمكيج واتعطر وحتى هسة لان مودائما اكدر اصعد فوك خالة جوة ايدي مكياج وعطر مو بس لزوجي لاااا احنا خطاطير طابة طالعة هم

وترى هاي مواعذار ام حواء ترى الصلاه متاخذ10 دقايق والله وانتي اذا مرتبة نفسج هذا الشي مو ضروري وهاي انتي اللي تعوتي عليه مو هو اللي عودج عليه موصح وحتا اذا هسة يحجي كولي اني اريد اضبط صلاتي وهذا الشي يبطلها

يعني احنا مونريد من رب العالمين زين غير نطيه حتى يطينا هم بالدنيا وهم بالاخرة حبي لاتزعلين من حجيي بس والله هذا من حبي الج ولكل البنات والله اموت عليكم احس انتو اهلي....

اسغلي خروج زوجج بالعبادة اني ما اكلج تقصرين بشغل البيت بس هم موتنسين ربج وترى عادي تصلين وانتي الميك اب كامل وحتى اذا .... غذروني بس للنصيحة بسيت النوم انتي تلبسين ازار الصلاة الكامل يعني يغطي كلشي فعادي صلي تدرون اني جنت قبل ما ننام اني وزوجي اكوم اصلي واني بسيت النوم والمكياج وارجع اكول حتى الله يبارك ....

والله يهيدكم اجمعين ياربي ويثبت كلبكم على الايمان واني وياكم يارب

هلو بنات شلونكم؟؟

حبي لولة فرحت من شفت كتابتج وان شاء الله ربي يخليلج برهوم وتعوضي بحنان الام الفقدتي

حبي ام حواء حاولي تكعدين وية صلاة الصبح تصلين وتقرين شوية قران والتومي باوقات الصلاة وشوفي شلون ترتاحين

اني اكعد وية صلاة الصبح اصلي الصبح واضل اقرة قران لحد متصير ستة ونص لان داختمة وبعدين ابدل واتمكيج واطلع للدوام ومن ارجع من الدوام ساعة ثلاثة رأسا ابدل واضلي ظهر والعصر وبعدين اتغدة وطبعا بعد مااجدد مكياجي حتى لو اطلع العصر لان اولا اضوج من المكياج وثانيا احس بشرتي تعبت من عدها وبعدين من تصير الغروب اصلي المغرب والعشاء بوقتها واسمع محاضرة

والله والله احس روحي كولش مقصرة واتمنى اضل ساجدة اسبوع لان والله لو شأسوي وااكدر ارد لرب العالمين شي لان دينطيني اكثر من طاقتي والله

وبالنسبة للاحلام اني هذاك الحمل هم جانت عندي احلام هواية بس هذا الحمل بس مرة حلمت ببزونة وبعد محلمت ودا ارش صبر لان يكولون هي تكتل التابعة وشايلة وياية العهود السبعة ويبقى رب العالمين هو الحافظ "قل لن يصيبنا الا ماكتب الله لنا"

هلو حبي ايلاف عفية عليج والله يقوي ايمانج يارب واكيد هو هذا الكلام الصحيح والله اني هسة ماعندي دوام بس اكعد من الاربع ونص واظل فد ل8 اكمل الادعية والقران وانام فد لل9 هاااي هسة لان ماعندي شغل هواية بس قبل لااا استمر اكمل شغلي بس هسة لااااا بس نوم صايرة خخخخخخ

حبي اشتريتي الحليب؟؟؟؟

هلو حبايب شونكم  فرحت  كلش باجوبتكم
ام حواء حبي ان شاء الله الضغط هالمرة ميرتفع  ترة حمل عن حمل يختلف ومدام تاخذين انتي وميوسة اسبرين لاتخافون وهمزين خف خدر ايدج الحمدلله والحركة ترة هية تصير بنص الخامس  يعني بعد وكت وبطنج لاتخافين هوة كل حمل البطن شكل تلحكين حبي على كبرها ومضايقتها وحقج الشتاء والثلج كلش كابة اني بالنسبة الي خوفي ووهواسي صار اكثر كلش تعلقت بابراهيم هسة الله يعوضكم وتشوفون شكد الضنى غالي كلساع اجي اشوفة يتنفس لولا وحتى على زوجي هم زاد القلق لان احس بعد ماعندي احد بالدنيا بس زوجي وابراهيم برهومي حلو نزاكة شكلة عبالك بنية  يكولون يشبهني العملية زينة بس تحسين متكدرين تشيلين ثقل والجرح الحمد للة مملتهب بس من رفعت الخيط الدكتورة كالت عقمية فد مرتين باليوم بوفيدون فاني لان قلقة كلت اظل اعقمة علما يروح اثره وزني تدرين مقستة للحد الان لان مدالحك بس حيل فشيت والرضاعة الطبيعية هم كولش تضعف 
ميوسة حياتي ربي يحفظلج الي ببطنج ومتشوفين شر ان شالة انتي وايلاف وتكومون اثنينكم بالف سلامة اني هم جنت اشوف موخوش احلام بذاك حملي بس بهذا حملي اولا تحجبت وزاد ايماني ويومية اصلي واستغفر وادعي وجابولي كومة حجابات خليتها جوة راسي ومشفت كابوس
دودو ونور فاطمة ربي يحفظكم وشكرا على مواساتج دودو وربي يفرح كلوبكم مثل مفرحني وتشوفون اطفالكم بحضنكم ويعوضوكم فرقة الاهل

حياااااااااااااااتي لولة كلبي شلونج الحمد لله انشاء الله دوم بالسلامة وحبي ضحكتيني على الجرح ترى يظل اثرة مايروح

هسة اني مثل ماهو من رفعت الخيط لحد هسة يصير شوية اعلى من الجسم ولونة هم يختلف اطوخ من الجلد والله يطمنج على ابنج وزوجج وحبي حقج تخافين عليهم بس هم خففي خوفج ميصير هيج حبي انتي اقري خمس مرات على برهوووومي وابوه اية الكرسي والله هو يتكفل بحمايتهم ....

حبي امانه تبوسيلي النزاكة برهووووومي والله يحفظة انشاء اللله وكون الله يتمملي على خير ويبعد عني شر الضغط يارب

هلااااو بنات منو موجود شونكم
طبعا اني قريت كلامكم ميوسه وايلاف واكيد الكلام هوه الصحيح اللي دتكولوه بس اني والله يا ام حواء حاسه بيج واني وره الزواج بصراحه هم تخربطت صلاتي وصيامي هم وخصوصا تزوجت قبل رمضان بيوم بوقتها طبعا فلا تكولون ليش ههههههه
زوجي يحب لبس وترتيب واظافر دائما بالبيت ويعني تعرفون شنو بعد وفعلا تره صعب واحد يدبر اموره بس لازم نرضي الله ونحاول اكثر نرتب الوقت اني مشكلة اكثر هسه انه اني اطلع من السته الصبح يعني اصلي الصبح اوكي بس ارجع بالسته ونص يكون حتى المغرب ماذن اريد اطب اتوضى قبل لا احط اكل ياذن العشا شون بهالحاله اني اصليهن قضاء بصراحه هسه رجعت احاول قدر المستطاع اسوي الاكدر عليه بس دا اتعب بين كل هالشغلات وياربي ياربي اهدينا وقوي ايماننا

هلووو بنات شلونكم حبي لولة والله مشتاقبلج ومكانج خالي وياربي تعدي الايام بسسرعة وتشوفين برهومي عريس وتظلين مكابلتنة وكاعدة تشكين من عندة ههههههههه

بنات طبعا اني مثل دودو وام حواء اني قبل مااتزوج الحمد لله فرض ماافوت ابد ومااكدر انام اذا مااصلي والله حتة من زمان بطلت اطول اظافيري واصبغهة علمود صلاتي بس من تزوجت تخربطت صلاتي وهذا الشي كلش مضوجني والله داحاول ارجع مثل قبل بس اني اللي يزعجني نطلع هواية ومن اطلع بعد تروح صلاتي ونرجع متاخرين مع العلم زوجي ميحب احطلة مكياج وهالسوالف لان يكولي احلى بلة مكياج وهوة لو حتة نمشي بالشارع هم يصلي ميفوتهة الحمدلله واني انقهر على روحي وثاني شغلة اني شعري كلش طويل ولازم ميوسة ترة ينغسل كلة غسل اني سامعة شيخ بالتلفزيون طلع واني كلش اضوج تعالي كلسع غسلي والله اتعب واني راسا اتمرض اذا اظل اغسلة ادعولي الله يهديني ويهدي الكل ميوسة حبي شسمة هذا الشيخ اللي رحتيلة واريد هاي الادعية اللي تفك الجبسة حبيبتي لان كتلكم اني عالفزات مالتي بنات اليوم كعدت ضايجة احنة نعرف وحدة خطية ميصير عدهة جهال وكووومة راجعت والبارحة حلمت بيهة هية وزوجهة كاعدين ويانة بالشقة وهية وكاعدة تشكي كعدت مخنوكة

هلو حبايب شلوووونكم؟؟

حبي لولة شلونج وشلونة النونو؟ دتكرصين خدودة؟ الله يخليجياه ياربي

بنات البارحة هم حلمت ببزونة بس مأذتني والله كمت اخاااااااااف

حبي ميوسة والله بعدني مشتريت الحليب لان بعد عندي حليب كي دي دي اخلصة واشتري الجديد

انتي شلونة وحامج حبيبتي؟

ام حواء وشوشو ودودو شلونكم حبايب؟

هلوووو بنات حبي ايلاف شلونج كلبي اني الحمد لله بس اليوم كعدت صايرة ريحه الصوبة النفطية من تنشعل تلعب نفسي منها فكعدت جانو هستوهم شاعليها ولعبت نفسي ومدا اكدر اكل لحد هسة فتعبانة حتى الحليب ما كدرت اشربه....

انتي شلونج اليوم؟؟؟؟

شو ام حواء البارحة واليوم ماكو انشاء الله المانع خير يارب....

ايلاف كلبي مو كتلج الزمي سورة البقرة هسة كلها هاي الاحلام تروح منج لان سورة البقرة تكطع التابعة....هسة كومي توضي واقري ها حتى لو تقسميها...

شوشو حبي اني مدا اكلج ما تبللي الشعر هو راح يتبلل بس مو تكعدين تغسليه.....

زين انتي تخافين تتمرضين وتردين الله يفرجها عليج وانتي ما تسوين ولو ابسط الواجبات اللي طالبها رب العالمين لمصلحتج طبعا.... شوفي اني اول سنة زواج هم جنت مثلكم اصلا تركت الصلاه بعدين شفت امورنا كلها تعرقلت كلت هاي رب العالمين دا يعاقبني ورجعت اصلي والله رزقني ومن صار اللي صار كلت لااا مو بس صلاة ارجع على ديانتي مثل قبل قران وتسبيح ... والحمد لله الله فرجها وانشاء الله راح ادزلج الدعاء بمسج وانتي اكتبيه وادللي عمري بس انتي شنو نوع الجبسة ماتج شوشو....؟

حياااااااتي ام حواء والله ظل بالي عليج...

وبالنسبة للغسل انتي عادي بنزل على الرقبة بس قصدي مو ينغسل بس يتبلل.... واني هااااي الطريقة اول مرة اسمع بيها اني هااااي متعلمتها من امي الله يرحمها.....وبعد الله اعلم....

وبالنسبة لحملج حبي لاااااتخافين انشاء الله ماكو شي اني اصلا صدري صاير لييين وبس بين وفترة وفترة تصير نغزة بس اكول كله بيد الله ما اريد افكر....

وحبي ام حواء خوما زعلتي من حجيي؟؟؟؟ترى والله من حبي الكم اني حجيت والله ماتصورون شكد احبكم

هلو حبايب شونكم  حبي ايلاف برهومي اي عنده خدود بس بشرتة حساسة ختية مومال كرص الله يرزقج بنونو حلو تشبعين منه انتي وميوسة وام حواء ودودو وشوشو  
اني عكسكم ورة متزوجت انتظمت صلاتي وزاد ايماني جنت قبل الزواج احس مقصرة وتانيب الضمير بس مابيدي شي بس من تزوجت وصار الاسقاط تحجبت وانتظمت صلاتي وزاد تقربي لله والحمدلله والشكر 
ميوسة ترة العملية مال  دكتورة ريا ممتازة حتى الوجع بالمسكن يطيب والحمدلله الجرح ابد ملتهب وهيج حلو خط مثل السكين على بطني والحمد لله طاب بس بعد ماعرفة لونة شون حيتسقر انتي ادرى يعني  شيصير لونة؟

طبعا ميوسة وحتى نظفت رحمي كلش زين بحيث الدم كلش قليل ورة العملية 

هلو بنات شلووونكم؟؟

حبي لولة منورة الجااات انتي وبرهوم

حبي لولة اذا د اخذ ابرة كليكسان بعد ماكو خوف من الجرثومة؟؟؟

السلام عليكم

حبي ام حواء الله يقوي ايمانج انشاء الله والله يهديج والله فرحتيني والله يتقبل منج ويوفقج ويتمملج على خير يارب....وترى رب العالمين يطي على النيات يعني لا تتكلفين وتتقيدين بصراحة اني هذا يحجي شي وذاك يكول شي وحتى مرات بالمحاضرات من اسمعها عبالك كل واحد يحجي شكل وعندي المسائل المنتخبة مال السستاني حجيه شكل فاني بصراحة امشي على الكتاب والله ما بي ايي تقييد لان الدين سهل والله يقوي ايمانج يارب....

لولة اي اني هم جرحي شلون الخط بس يكون اعلى من الجلد ولونة اطوخ بس هسة بالحمل دا تصير عندي نغزات والم فشوية دا اخاف..... والحمد لله من كمتي بالسلامة انتي والنونو الوردة يارب وامنة تبوسيلياه عفية وحدة من خدة وحدة من ايدة عفية مو تنسين.....

ايلاف كلبي شلونج اليوم؟؟؟

دودوشوشونور الهدى نور فاطمةونونة شو صار فترة ماكو شلونكم