هلو بنات شلوونكم تسلمولي عالتوضيح ..حياتي ام حواء تسلميلي ان شاء الله مابيج غير العافية والله مااعرف ليش ليهسة عندج وحام تحملي عمري كله يهون
حياتييي دودو مشتاقتلج طبعا والله رديت علييييج بس هسة رجعت لكيتة ماكوالتعليق حياتي اعذريني ماعرف وين طار خخخخخ
عمري اني الحمدلله زينة ان شاء الله باجر اروح للطبيبة صار يومين نريد نروح ويجونة خطار
احجيلي شخبارج شلونة الجو يمكم هو والله ماكو اصلا احلى من سوالفج بالدردشة والله عمري باقي البنات شلونكم

حبي شوشو اعتذر عالتاخير بس مدافتح نت بالحاسبة من ورة برهومي ثابرني لفت  نظري تحاليل الي كاتبها نونة وام حواء هم فعلا مهمة وانتي انتظري روحي وهية شتكتب واول تالي حترجعيلها يوم 13 من الدورة علمود السونار وتكون كل تحاليلج كاملةويارب يكون الحمل على ايدها
دودو قلبي اخذي نص حبة لان ناطيج ضعف الجرعة الي كتلج عليها فاخذي نص حبة يوميا بعد الاكل وماعندج غير العافية
ام حواء وميوسة سلامتكم الله يساعدكم عالوحم ام حواء اخذي فيتامين بي 6 او اذا عدكم دوة اسمة navidoxine هوة مال لعبان النفس القوي بالحمل

بنات شلونكم شخباركم اني كلش ضايجه ومكتئبه لان البارحه صارت مشكله ويه زوجي ووكعت على بطني ومن عصبيتي ضربت بطني وكامت توجعني وبعدين صحيت على نفسي وانهاريت وبقى زوجي يهدي بيه وبقيت نايمه على ظهري للصبح اخاف الطفل صار بيه شي مانمت شكد ما بجيت متت واليوم كعدت ماكو وجع خفيف وسويت ريوك وغدا وكاعده وهم ما اكدر اروح للدكتورة لان البارحه جنت عدها عفيه الي عدها خبرة تكولي خما يكون صار شي بالطفل اني كل شويه افوت للحمام ما نزل عليه اي شي بس بعدني بقلق شسوي

السلام عليكم
شلونكم بنات
حبيبتي ام حواء الله يساعدج والله مارة بهيج حالة ' اكو بعض النساء يستمر الوحام عدهم للتاسع وان شاء الله انتي مو منهم
حبي اميرة اني ببداية الحمل هم جنت مثلج بسرعة اصير عصبية واتقصد ائاذي نفسي والطفل كدام زوجي حتى اجذب انتباهة بس بالاخير حيل انتدم لان احنة ورة ساعة اثنين نتصالح بس صار شي على الطفل مراح يرجع شي وراح تضلين عمرج كولة ندمانة

حبي ديري بالج على روحج وعلى طفلج لان محد يفيدج غير زوجج واطفالج بالمستقبل وربي يتمملج على خير

حبي شوشو يارب ترحين للطبيبة وتبشرينا مبيج شي
حياتي ميوسة شلونة وشلونة النونو
نور الهدى وهند ونونة شنو اخباركم حبابيب؟؟

دودو حبيببي شو هل ايام ماكو يارب المانع خير

حبيبتي لولة ماعرف شلون اشكرج على وكفاتج وياية ربي يخليلج برهومي يااارب

ايلاف قلبي احنة خوات عيب تشكريني شتحتاجين اني حاضرة بس كومينا بالسلامة
ميوسة الله يسلمها للدكتورة وربي يحفظها  طبعا مستحيل اكو هيج طبيبة وردة مثلها بالهوقت ربي يسعدها دنيا واخرة فد مشتاقتلها الله يعلم

هلو بنات اول شي تسلمولي كلكم عالدعوات الحلوة ام برهومي الوردة متقصرين ربي يحفظلج برهومي والبنات هم ماقصرو
طبعا اليوم رحت لدكتورة ريا رحنة اني وزوجي ومااعرف ليش مكلت لاحد حتة لاهلي مكلت والله بس الكم اخذتة ورحنالهة
طبعا من وصلت الدكتورة للعيادة جنة اني وزوجي واكفين برة العيادة دنسولف وهية فاتت عالسريع فمن اجة سراية فتت جان تكولي ها ي انتي اللي جنتي تسولفين وية زوجج كتلهة اي جان تكولي دركضي صيحي طبعا شنو وردة مال الله صدك طلعت تنحط بنص الكلب طبعا صحت زوجي وكعدتنة وكالت هسة نسولف على راحتنة طبعا شكد احب الطبيب ياخذ وينطي وية المريض واحنة كل اطباءنا تقريبا مو هيجي كلهة شايلة خشومهة وعالسريع بس هية وردة
طبعا حبتنة كلش وكعدت تسولف وية زوجي من عرفتة دارس بامريكا وهوة هم مهندس وكعددو يسولفون بالانكليزي وشكد متواضعة ياللة بحيث هية كامت تسألة على شغلات
طبعا ظلت تسألنة اسألة وكالت ان شاء الله ماكو شي ومراح اخليج تسوين هاي تحاليل الهرمونات اللي تصير ثاني يوم الدورة لان انتي الدورة تجيج كل شهر فميحتاج كالت بس سوي تحليل هرمون الحليب هسة وتحليل الانتي سيرم اعتقد الي ولزوجي بعدين كالت يلة خلي افحصج داخلي طبعا اول مشافت كالت مبين رح تجيج الدورة فحصتني جان تكول انتي عندج الرحم مقلوب وهذا شي عادي طبعا اني راسا صرت صفرة وسكتت جان تضحك كالت بابة كلششش عادي يعني اكو ناس تنولد هيجي يعني شلون هسة انتي مولودة عيونج خضر رحمج هم مقلوب صاير عاد اني ارتاحيت شوية كالت بس لازم من تخلصون جماع تنامين على بطنج ساعتين اقل شي اشو اني كلش استصعبتهة وطبعا كتبت لزوجي هم على تحليل المني السبت ان شاء الله من نستلم نتجية تحاليل مال يوم يسوي لان لازم 3 ايام بلة جماع وطبعا كلتلي هسة السونار ميفيد تجين يوم 13 من الدورة ناخذ سونار وان شاء الله ميصادف خميس او جمعة بعطلتهة بنات عفية كلولي شتعرفون عالرحم المقلوب صدك عادي لو شنو هية كالت من تصيرين حامل هوة يتعدل
وبنات كلولي مختبر 14 رمضان شلونة زين لو شنو لان احنة سوينة بي التحاليل لان هية كالتلنة وزوجي هم كال بعد ليش دنروح للحارثية ميوسة لولة اذا مجربي كلولي

هلو حبي ام حواء طبعا انس مأاخذت سونار لان كلتلي ميفيد اليوم بس فحصتني داخلي عرفت طبعا هسة اني داارجف هسة قريت عالرحم المقلوب بي حالات تاخر الحمل او تسوي عقم اذا يكون مقلوب ووملتصق او البطانة مااعرف شبيهة والله متت خوف

حبي هية اول مفحصتني كالت مبين رح تجيج مااعرف شلون حبي ام حواء يعني شنو اظل بوضع السجود ساعة لو انام علة بطني ورة منخلص

تسلمين حبي ام حواء والله احس نفسي مخنووكة وكلش ضجت من صار الحجي كدام زوجي مااعرف ليش

حبيبتي الله يبرد كلبج مثل ماريحتيني وتكومين بالسلامة وتشوفين بنتج بحظنج والله ينطيج على كد نيتج

حبيبيتي شوشو همزين  رحتي للدكتورة وفرحتي بتعارفها  وشفتيها شكد وردة ومتواضعة حيل فرحت لان انتي هم حبيتيها لان هية والله وردة وشاطرة باعي قلبي بالنسبة للرحم المفلوب ابد لاتخافين عمتي اخت ابوية هم رحمها مقلوب تاخرت 6 شهور محبلت وهم الطبيبة كالتلها من تحبلين يرجع يتعدل وبالفعل ورة محبلت تعدل وهسة عدها 3 جهال وحتى تكول  النوب الطفل الثاني والثالث صارو  راسا ورة الاول بحيث كامت تبجي لان تعب عليها وبالنسبة لوضعية الجماع اني ماعرف عن السجود بس هية كلش مقربة الي وجنت هم من تاخر حملي ببرهومي اسالها عن وضعية الجماع فكالتلي انه الوضعية العادية نايمة وثانية رجلها مفتوحة  فيعني حسب اعتقادي انه عادي اي وضعية ممكن يصير الحمل اذا الله كاتبة يصير واجوز وضعية السجود تكون اسرع بس اني برايي التزمي بكلامها من تكولج نامي ساعتين لان هية كلش تفتهم اني جنت اظل نايمة ساعة تدري ومصعدة رجلي ليفوك هههههه بحيث من اكوم رجلي متشنجة
وبالنسبة انه شون عرفت انتي حتجيج الدورة لان قبل الدورة بطانة الرحم تصير سميكة فاما تنزل دورة او يصير حمل بحيث اول ميسون سونار من متجي الدورة يشوفون بطانة الرحم سميكة يكولولها للمرة لو حتيج الدورة لان حتنسلخ البطانة وتصير دم لو حيصير حمل فلذلك يكولولها ميبين هسة عرفتي ليش
وبالنسبة لمختبر 14 رمضان زين موقاصر اني كل تحاليلي جانت يمة بس شنو جنت اضوج من تعامل واحد موظف طويل وضعيف بيه هذا اموت منه هههههه مرة الا شوية واتعارك وياه  
وربي يفرح كلبج وان شاء الله تصيرين حامل على ايدها وشوفي لوهية تشك اكو خطر او مشكلة بالرحم المقلوب ترة تكولج لان هية كلش صريحة حتى لو شي مزعج فلاتخافين وفرحي وانشالة تطمنينا على نتيجة التحاليل والسونار

هلو حبايب شلونكم لولة وميوسة تسلمولي عمري عالتوضيح ميوسة هاي الطريقة رح اجربهة ولو اني مجربيتهة والله البارحة الليل كلة منمت اني مضايجة على نفسي ضايجة لان زوجي حسيتة عبالة هذا الشي شي جبير وبعد ميصير عدنة كلش مخنوكة ان شاء الله بلكي على ايدهة هالشهر يصير حمل

شلونكم ينات يارب الكل بخير وينها دودو اشو مختفية يارب المانع يكون خير حبيبتي شوشو اولا مبروك لان رحتى للدكتورة والله يجعل على ايدها السبب واشو تبين حبابة وخوش دكتورة شوقتوني اشوفها وثانيا اصلا حمدي ربج وشكري انه اكتشفت هالشي وانه رحمج مقلوب معناها دكتورة شاطرة وفعلا هواية جانو هيج ومايصير الهم وبس غيرو الوضعية صار عدهم حمل يعني يجوز هو هذا السبب التاخير ولا تحتاجين ادوية او علاجات والحمدلله كلشي عندج طبيعي وانتي طبقي اللي البنات كالو عليه وترى هاي الشغلة سهلة جدا وهواية مثل حالتج وفعلا هذا شي ولادي واكو بعد عملية الكرتاج او الاسقاط يقلب عندهم الرحم وهم كتلج شي طبيعي ويصير حمل وبعد اول ولادة يرجع بمكانه وهواية اني سامعة وشايفة هيج حالات وابد لايظل بالج ولا تفكرين بالموضوع اصلا ويااااااااااااارب يارب هالشهر يصير عندج الحمل وتبشرينا

حبي نور تسلميلي والله يسمع منج والله يرزقج ويرزقنا كلنا بالذرية الصالحة يارب

هلو بنات شلونكم

حبيبي شوشو هذا اول شي ابد ميخوف عندج والله اني اعرف وحدة رحمها مقسوم نصين وصار عدها طفل ورة طفل
هسه يطلع المانع الحمل شي جدا بسيط والله
حبي ام حواء شلون صرتي اليوم؟؟؟
حبي ميوسة شلونج خلص الوحام ؟؟ شوكت ترحين تشوفين النونو

حبيبتي لولة شلونج وشلونة برهوم بدة يضحك

نور الهدى شلونج حبيبتي شنو هل غيبة ؟؟؟
دودو ونونة وهند واميرة شلووونكم ؟؟

حبي شوشو فهمي على حجينا لزوجج وكوليلة ترة الشغلة جدا عادية وسهلة وتكدر تقرة عنها بالنت حتى يتفهم الموضوع وميوسة كدامج هم مثل 
ايلاف قلبي اي بدة يضحك من احجي وياه الصبح خاصة من يكعد من النوم يتمطة فاظل اسولف وياه يكوم يبتسم وصاير من يكعد ويبجي يندارويباوع  علية يعصر بروحة يعني صار يميز اني المنقذة اله هههههههه
ام حواء حلوة هاي برامجج من احبل مرة لخ اذا الله راد انزلها ولاتخافين 13 موشي يخوف اني جنت 13\9 ومشت الامور والله يساعدج عالوحم اكلي هاي الاشياء الخفيفة ترة هم مغذية مو شرط لحوم  وهية فترة وتعدي ولعيون البنوتة كلشي يهون